Megum tíma missa?

Aldrei hef ég kallað mig lögfræðiprófessor. Væri ég það, myndi ég vita hvers vegna rjúfa þarf þing mánuði fyrir kosningar. Af hverju má það ekki starfa fram að kjördegi? Hvað gerist milli þingrofs og kosninga? Sérstaklega þegar staðan er eins og nú?

Má ekki demba einföldu frumvarpi gegn um þingið sem leyfir því að starfa til kosninga? 

Eitt að lokum. Á vefnum Nýja Ísland (hlekkur hér til vinstri) verður hægt að skoða tengsl hinna ýmsu stjórnmálamanna við atvinnulífið. Þessi hluti síðunnar er kallaður Ættartréð. Endilega kíkið og hjálpið til við að búa þennan lista til svo hann verði nothæfur fyrir kosningar. 

Kosningar verða 25. apríl

Með dökkan blett...

Hverjar eru líkurnar á að þetta vandamál eigi eftir að versna í réttum hlutföllum við efnahagsþrengingarnar? Þegar mamma og pabbi eru á kúpunni pirrast þau yfir öllu í fari barnanna og nenna ekki að sinna þeim. Eða er þetta vandamál ríkidæmisins? Við erum svo rík og bisí við að spila golf og glápa á ædolið að við höfum ekki tíma fyrir börnin? Þá er ljótur kall sem vil ólmur sinna litlu stelpunum og sjá þeim fyrir smá kandí í staðinn.

Hvernig menn eru það sem notfæra sér 13 ára börn? Hver er það sem ekkert vill frekar en slefa á barnslíkamann og snerta þar sem ekki má? Hvaða týpa er þetta?

Hvernig foreldrar eru það sem láta þetta viðgangast? Ég er ekki viss um hvað ég myndi gera við slefberann sem snerti dóttur mína, ef ég ætti eina á þessum aldri. Efast um að ég tæki hann vettlingavöldum.

Einhvers staða las ég að fjórðungi kvenna er nauðgað eða eru misnotaðar kynferðislega. Hvers konar skepnur erum við? Hverjir eru þessir aumingjar sem gera þetta? Ef ein af hverjum fjórum lendir í hremmingum, hlýtur stór hluti okkar karlmanna að vera illa brenglaður.

Þrettán ára selja sig fyrir fíkniefni

Hver erum við?

Ég hef oft spurt sjálfan mig þessarar spurningar. Hver erum við, íslendingar? Hvaðan komum við og hvert erum við að fara? Við lifðum af 1000 misharða vetur. Við komumst í gegn um endalaus áföll, náttúruhamfarir, farsóttir og almenna vesæld. Við létum okkur hafa afskipti misvitra konunga sem sá til þess að dauðarefsingum væri fullnægt þegar flestir íslenskir embættismenn vildu milda dóma.

Af þessu að dæma ætti Ísland að vera byggt fólki sem er sterk og styður hvort annað. Fólk sem er í snertingu við landið og hvert annað. Þó er verla hægt að segja það. Við skiptum okkur sem minnst af hvoru öðru, látum aðra um skítverkin, svíkjum hvort annað og sjáum ekki fegurðina í kring um okkur. Hljómar eins og alhæfing og þetta á ekki við um alla, en staðreyndin er sú að ástandið versnaði eftir því sem okkur fór að líða betur. Upp úr aldamótunum 1900 var haft eftir erlendum ferðalangi, sem kom í aðra heimsókn sína, að allt væri breytt. Þjóðin sem hann varð ástfanginn af 20-30 árum áður var breytt, gestrisnin horfin. Hvað hefði hann sagt í dag?

Við lifðum þessar aldir af með því að vinna saman. Þrátt fyrir allt, stóðum við saman og hjálpuðum hvoru öðru. Við vorum stoltir kotbændur. Hvað erum við í dag?

Aldrei of blönk til að hugsa

Land með framtíð

Skemmtilegt að sjá þetta. Ísland getur orðið paradís ef við höldum vel á hlutunum og heimurinn fer ekki til hins rauða vegna græðisvæðingar. Á Íslandi er mikið hugvit og þjóð sem lifði af þúsund heimskautavetur og erlenda kónga með puttana í okkar málum.

Eftir hrunið er ekkert annað að gera en að byrja upp á nýtt. Nýja Ísland. Ísland 2.0. Hvað sem fólk vill kalla það. Við getum búið til fyrirmyndarsamfélag ef við stöndum saman.

Ég hef eytt vikunni í að endurhugsa og endurhanna síðuna Nýja Ísland. Endilega kíkið og sjáið hvort þið getið hjálpað. 

Íslensk framtíðarborg í Washington

Magur biti...

Það er ekki gæfulegt að leiða sjallana inn í komandi kosningar og það veit Þorgerður Katrín. Hún hugsar dæmið kannski svoleiðis að betra sé að halda áfram sem varaformaður og láta einhvern annan standa í brúnni við skipbrotið. Svo þegar vinstri stjónin missir fylgi vegna óvinsælla aðgerða sem eru afleiðing hrunsins og kreppunnar, tekur hún við af þeim sem drukknaði í kosningunum 2009 og leiðir flokkinn til sigurs. Hún er ung og verður það enn eftir fjögur ár.

Það er betra að hinkra og taka við seinna. 

Þorgerður Katrín ekki í formannskjör

Mun sannleikurinn koma í ljós?

Er þetta ekki maðurinn sem var ógnandi fólki um áramótin? Það þarf ekki að gúggla lengi til að sjá að hann á bágt með að stjórna skapinu. Ég vona að sannleikurinn komi í ljós í þessu máli, en óttast að það gerist aðeins ef hann hefur rétt fyrir sér.

Sjáum hvað setur. 

Ólafur segir mótmælenda hafa skemmt bifreið sína

Ljúgðu að mér, ástin mín.

"Stjórnmálaflokkar sem eiga sæti á Alþingi hafa „ríkisvætt“ sjálfa sig með því að úthluta sér árlegum framlögum úr ríkissjóði, miðað við þingstyrk." MBL.is

Hér er komin fullgild ástæða til að kjósa ekki stóru flokkana. Þeir hafa meira fé, okkar fé, og munu nota það til að sýna okkur hvað þeir eru miklu betri en hinir. Við erum að borga þeim til að þeir geti lagfært sannleikann fyrir okkur. Ég mæli með því að fólk hlusti ekki á auglýsingar og áróður. Hlustið á það sem frambjóðendur segja og berið það saman við það sem þetta fólk hefur gert hingað til. Kjósið eftir því. Ekki gleyma því sem á undan er farið. Ekki gleypa við glansmyndum af fótósjoppuðum jakkafataköllum og sætum stelpum. Ekki láta skrumið plata ykkur.

Burt með áskrifendur að peningunum okkar! Við erum nógu skuldug samt.

Dýr kosningabarátta er ekki í spilunum

You Thumb Sucking Son of a Boyo

Geir er eins og ævintýrapersóna. Hann er fallegur og góður, en þó virðist eitthvað vera ekki eins og það á að vera. Svo þegar honum er bolað frá, breytist hann í þá kynjaveru sem hann var alltaf inni við beinið og bítur og brennir borgir og brýr. Hann talar um hatur og dásamar þá sem þjóðin urrar sem mest yfir. Í hvert sinn sem hann opnar munnin gapar þjóðin meira. Held ég.

Geir, ef þú vilt ekki eyða út restinni að fylgju sjallanna, ekki tala. 

Ég er að dunda mér við að setja HD myndbönd inn á netið. Allt sem ég hef gert sem lítur þokkalega út eða er ekki hundleiðinlegt mun koma til með að prýða mína nýju þútúpu síðu. Mér fannst þetta viðeigandi við þetta tækifæri. Mugison og hans fallegi fagurgali um þumalsugusoninn.

 

Geir þakkar stjórum Seðlabanka vel unnin störf

Litið til baka

Það er oft sagt að þjóðin hafi ekki séð hrunið fyrir, við flutum sofandi að feigðarósi á jeppunum okkar. Ég var byrjaður að blogga löngu áður en þessi stjórn tók til valda, svo það gæti verið skondið að sjá hvað ég skrifaði þegar hlutirnir voru að gerast.

13.05.07 - Stjórnin Fallin!
Væri Ísland eitt kjördæmi hefði stjórnin nú 48.4% atkvæða, hún væri því fallin. ... Ríkisstjórn Sjálfstæðisflokks og Samfylkingar (42 þingmenn) yrði sterkasta stjórnin í stöðunni eins og hún er núna, með 42 þingmenn á móti 21. Ég spái að þetta verði ofan á. ... Þessi stjórn myndi sennilega halda áfram á svipaðri braut og gamla stjórnin þar sem sjálfstæðismenn eru sterkari flokkurinn. Það er hugsanlegt að eitthvað verði hægt á stóryðjumálum í bili, en þegar hægir um og stjórnin er búin að koma sér fyrir fer það allt af stað á ný. Vilji Samfylkingarinnar til að stoppa stóriðju er ekki nógu sterkur til að eitthvað gerist í þeim málum.

14.05.07 - 5%
Þetta eru mikil vonbrigði fyrir Ísland, íslendinga og lýðræðið í landinu. Ég hélt að kosningalöggjöfinni hefði verið breytt á undanförnum árum til að gera vægi atkvæða jafnara og dreifingu þingsæta réttlátari. Við virðumst hinsvegar vera á svipuðu róli og Bandaríkin þar sem atkvæði eru ekki það sem skiptir mestu máli. 

11.09.07 - Skjóta gæðinginn í hausinn
Ísland er alveg sérstaklega fallegt land... ennþá.
Ísland er sjálfstætt ríki... ennþá.
Ísland er ríkt... ennþá.

16.11.07 - Imagine no possessions, voru þessir peningar til?
Hvað er eign? Ef þetta er húsið mitt, af hverju skulda ég einhverjum banka næstum allt verðgildi þess? Hvernig getur banki búið til peninga úr engu? ... Peningurinn á reikningnum mínum er færður inn sem skuld bankans, en á móti er lánið mitt eign bankans. Þessar færslur eyða hvorri annari út, ég keypti húsið fyrir ekkert.

22.11.07 - Launaþrælar
Það er vont að vita til þess að í alsnægtarþjóðfélaginu á Íslandi hafi 60% þjóðarinnar ekki efni á að kaupa sér húsnæði. ... Hver sem ástæðan er, þá er það greinilegt að á Íslandi er ekki það þjóðfélag sem við vildum, unnum að og héldum að við byggjum í. ... Hvað er að þjóðfélaginu? Hvernig má bæta það? Ef íslendingar geta ekki lifað af launum sínum, hver getur það þá? ... Stöndum saman og gerum Ísland að draumalandinu sem það ætti að vera.

31.01.08 - Bleikar nærbuxur
Hér er lítil spurning. Er Alþingi íslendinga óhæft? ... Meðan rifist er um hvort börn megi klæðast bleikum og bláum nærbuxum, hvort ráðherra sé frú, hvort byggja eigi göng til Vestmannaeyja og flugvöll á skeri eru lög landsins hálfkveðnar vísur. Það er eitt að alþingi geti ekki lokað reykherbergi (sem það leyfir sjálfu sér að njóta), en þegar ríkisstjórn Íslands skilur ekki hvernig leiga virkar er ég svo hissa að ég fer að skrifa færslu um nærbuxur.

15.03.08 - Ingibjörg, er þetta rétt. Ertu að fremja pólitískt sjálfsmorð?
Ingibjörg Sólrún getur látið eins og Írak hafi aldrei gerst. Hún getur látið eins og Taiwan sé Árnessýsla þeirra kínverja, hún getur talað um eitt Kína meðan tíbetar eru myrtir. Hún getur gert hvað sem hún vill, en ekki gera það í mínu nafni. Íslendingar vilja ekki dauða tíbeta og kúgaða taiwana í nafni viðskipta. Ég ætla að sleppa því að minnast á Falun Gong ævintýrið í bili. ... Við höfum ekkert erindi í öryggisráðið. Við þorum ekki að tala eftir eigin sannfæringu.

28.03.08 - Ég vil ekki nöldra...
„Að ljúga að öðrum er ljótur vani, að ljúga að sjálfum sér hvers manns bani”, sagði þar," sagði Davíð. Ég vil ekki vera leiðinlegur, en átti stóriðjan ekki að vera töfralausnin?

30.03.08 - Landráð?
Nú virðast flest spjót beinast að okkar eigin íslensku bönkum. Flest bendir til að þeir hafi eitthvað með hrun krónunnar að gera. 

04.04.08 - Barist á Bakka
Á endanum tók ég afstöðu á móti frekari stóriðju. Það var ekki vegna Draumalandsins, ekki vegna Kárahnjúka, ekki vegna neðri hluta Þjórsár. Ástæðan var þessi græðgi, þessi bulldozer hugsanaháttur.

22.06.08 - Einn kjósandi, eitt atkvæði, eitt kjördæmi
...þegar flokkur með 8% fær 5 þingmenn en flokkur með 6% einn og 4.9% engan? ... Er ekki kominn tími til að einfalda kosningakerfið? Einn kjósandi, eitt atkvæði, jafnvel eitt kjördæmi? Er ekki kominn tími á alvöru lýðræði, eða a.m.k. eitthvað í þá áttina?

26.06.08 - 1000 heimili undir hamarinn...
CNN var að tala um að íbúðamarkaðurinn í Bandaríkjunum væri svo veikur að ein milljón heimila væru að fara undir hamarinn. Svo maður setji þetta í íslenskt samhengi, eru það 1000 fjölskyldur sem væru að fara á hausinn. Það væri athyglisvert ef einhver veit hver staðan er heima. Hvað eru margir að missa heimili sín? Mun þetta hrun í USA hafa áhrif á Íslandi og viðar? Mun þetta verða til að ríkir verði enn ríkari með því að sópa til sín ódýrum fasteignum? 

01.08.08 - Brýnt að vanda sig
Það er líka hallærislegt af forsætisráðherra að láta sjást að hann sé ósammála ráðherra í hans eigin ríkisstjórn.  

18.08.08 - Samkeppni
Það er sorglegt að að koma heim og sjá hvernig komið er fyrir þjóðinni. Ein matvöruverslun (Bónus), ein verslun með afþreyingarefni (Skífan). 

Svo hrundu bankarnir og ég fór að nöldra og þykjast vita allt, eins og allir hinir. Ég bloggaði eiginlega um allt annað en stjórnmál og fjármál fyrir hrun. Ég var þó allavega samkvæmur sjálfum mér. Ég var ekki að lofsyngja gósentíðina á bleiku skýi með gula hörpu. Og ég keyri ennþá um á gamla bílnum sem var klesstur hér og skulda ekki krónu í honum.

Baksvið: Þingvallastjórnina þraut örendið

Kosningabarátta sem skiptir máli

Ég er búinn að missa álitið á Samfó, en vona að Jóhanna verði forsætisráðherra, komi til þjóðstjórnar. Hún hefur verið ljósið í myrkrinu síðan í byrjun október.

VG hafa safnað að sér gífurlegu fylgi. Nú kemur í ljós hvort þeir eigi það skilið. Taki þeir á málum af ákveðni og gegnsæji, munu þeir sennilega bæta við sig. Eitt feilskref, og þeir eru komnir niður í tíu prósentin, þar sem þeir ólust upp. Þjóðin er allt of vakandi, allt of pirruð til að fyrirgefa slepjuhátt.

Það eru spennandi tímar framundan. Nú er að sjá hvaða flokkur eða hópur fólks á atkvæðin skilið. 

„Nú reynir á Vinstri græna"