Þar til rétt niðurstaða næst

Kosningar innan ESB eru athyglisverðar. Þótt fólkið sé yfirleitt frekar á móti frekari samruna, evrunni, stjórnarskránni, virðast embættismenn eiga sér þann draum að sameina Evrópu. Koma öllum undir sama hatt. Til að geta stjórnað okkur plebbunum betur? Fæst lönd þar sem evran var tekin upp buðu fólkinu að segja sína skoðun. Þingið ákvað fyrir lýðinn. Flest lönd þar sem fólk fékk að kjósa, höfnuðu henni. Þá er kosið aftur og aftur þangað til rétt niðurstaða fæst, og svo aldrei meir.

Sama með evrópsku stjórnarskrána. Þegar fólkið hafnaði þessum doðranti sem er á stærð við símaskrá, var nokkrum setningum breytt lítillega, nafninu breytt í Lissabon-sáttmálann og kosið upp á nýtt. Og aftur. Og aftur. Þangað til pakkið drullast til að segja já. Og svo ekki meir.

Evrópskt lýðræði er að spyrja aftur og aftur þar til "rétta" niðurstaðan fæst. Svo ekki meir.

Líklegt að Írar samþykki Lissabon

Bin Laden...

...er dauður.

Svo er mér sagt. Að vísu ber sögum ekki saman um það hvernig hann hrökk. Ein segir hann hafa verið drepinn, önnur segir hann hafa fengið lifrarveiki. Ég veit það svo sem ekki, hef ekki hitt manninn. Læt mig bara hafa það að fallast á að hann sé dauður, hvernig sem það gerðist. Annars hefði hann komið meira fram.

Ef hryðjuverkahættan væri eins voðaleg og okkur er talin trú um, væri mikið meira um hryðjuverk. Það er ekki svo erfitt að sprengja strætó, flugvél, stórverslun eða einhverja lestarstöðina. Ráða stjórnmálamenn og bisnisskalla af dögum. Ein sprengja í mánuði einhversstaðar í hinum vestræna heimi og flestir munu sturlast af hræðslu. Heilu þjóðfélögin myndu lamast. Nei, hér er Al-Kæda ekki á ferð. Það er eitthvað annað í gangi.

Bin Laden er goðsögn.

Ný hljóðupptaka frá bin Laden

Hugmyndin er...

...að íslendingar verði flestir miðað við höfðatölu síðsumars 2020.

Ísland verði eitt af samkeppnishæfustu ríkjum heims

Hvíl í friði, Nýja Ísland.

Atburðarrásin fyrir ári síðan var eins og í bíómynd. Leynifundir að næturlagi, heilt þjóðfélag ryðar til falls en enginn James Bond eða Jack Ryan til að bjarga því. Það sem tók við voru svo hrikalegar hamfarir að enginn gat ímyndað sér að svoleiðis gæti gerst. Stjórnmálamenn horfðu í kringum sig, klóruðu sér í hausnum og reyndu að sparsla í þetta.

Þjóðin sameinaðist í sundrunginni, allir reyndu að gera sitt. Nú myndum við standa saman og búa til þjóðfélag sem við virkilega vildum lifa í. Gamla Ísland var hrunið. Kominn tími til að byggja Nýja Ísland. Það sem gerðist var þó að það var settur plástur á báttið og allt átti að verða eins og fyrir hrun. Við búum enn á Gamla Íslandi, en hripleku. Við bíðum eftir að kafbáturinn sem sökkti okkur komi og bjargi okkur. Velkomin í ESB.

Ég var og er erlendis, svo ég gat ekki veifað fána og barið á pott. Ég setti upp síðuna Nýja Ísland. Hugmyndin var að safna upplýsingum um hrunið og ástæður þess, búa til samfélag þar sem fólk gæti talað um landið sem það vildi byggja upp og safna nógu mörgum meðlimum til að geta haft áhrif. Ástæða þess að síðan varð til varð henni að falli. Ég var ekki á Íslandi og gat ekki kynnt hana almennilega. Hún lifði í einhvern tíma, en var farin að safna kóngulóarvefjum upp úr áramótum. Lítið sem ekkert hefur gerst á spjallinu síðan þá.

Ísland fékk nýja stjórn sem er jafnvel verri en sú fyrri. Við fengum nýjan stjórnmálaflokk sem sprakk svo í loft upp nokkrum vikum eftir kosningar. Bankamennirnir og útrásarvíkingarnir eru enn að fjárfesta meðan þeir eru ekki sötrandi kokkteila á snekkjunum. Þjóðin er sokkin í skuldafen og hefur hvorki áhuga né þrek til að synda. Hún bíður eftir að einhver hendi í hana kút, einhverjum stóra sannleik sem mun leysa öll okkar vandamál. Jóhanna virðist trúa því að hún hafi fundið kútinn, en skilur ekki að hún er að strjúka tundurduflinu.

Síðan Nýja Ísland verður ársgömul um miðjan október. Þá þarf að endurnýja lénið og það kostar pening sem er ekki til. Hrunið er spennusaga sem endaði illa. Nýja Ísland mun engu um það breyta. Við komumst út úr þessu einhvern daginn, með eða án einhverrar heimasíðu.

Nýja Ísland, hvíl í friði. 

Rauðri málningu slett á hús Hreiðars Más

Berjumst fyrir friði

Berjumst fyrir friði. Er það besta leiðin? Ef einhver öskrar á þig útí búð, kallar þig homma, komma eða druslu, hvað gerirðu? Þú getur "varið" þig og öskrað á móti og þannig skapað rifrildi eða slagsmál. Þú getur líka látið eins og manneskjan sé ekki til og látið þetta fuðra upp. Það þarf tvo til að búa til rifrildi. Það er ekki hægt að berjast fyrir friði án þess að fara út í stríð og drepa þannig alla möguleika á friði.

En þetta stríð er öðruvísi. Það var ráðist á okkur. Eða hvað? Jú, það var ráðist á tvíburaturnana. Ég ætla ekkert að fara út í það hver gaf skipunina. Breytir engu. Hvað gerðum við? Réðumst á Afghanistan. Bjuggum til meira hatur og heift. CIA setti Bin Laden á sinn stað, gaf talibönum vopn til að klekkja á rússum. Bjuggu til vesenið sem þeir eru að berjast við núna. Svo var ráðist inn í Írak að ástæðulausu. Og ekki segja að það hafi verið erfitt að sjá það þá að þetta voru lygar. Ég sá í gegn um það. Flestir gerðu það, held ég.

En hvað hefðum við getað gert? Fyrir það fyrsta, ekki breiða út hatur. Ekki segja heiminum fyrir, ekki vera "bully". Ef þú sýnir réttlæti, mun heimurinn virða þig. Fari hlutirnir samt til fjandans eins og gerðist fyrir rétt rúmum átta árum, ekki fara í stríð. Snúðu fólkinu á þitt band. Hjálpaðu afgönum að losa sig við talíbanana á friðsamlegan hátt. Þú getur ekki slökkt eld með eldi. Gefðu fólkinu möguleika á að leysa sín mál sjálft. Ekki sprengja allt í loft upp og drepa heilu þorpin i nafni friðar.

En stríð eru ekki okkar áhugamál. Vopnaframleiðendur hafa forseta í vasanum. Verktakar sem fá það verk að endurbyggja heilu löndin sem hafa verið sprengd aftur í steinöld gera allt sem þau geta til að koma stríðinu á koppinn.

En það er líka stríð á vesturlöndum. Þar er ekki barist um lönd, heldur völd yfir þér. Ísland er sérdæmi, enda varð að koma því harkalega á hausinn til að koma því inn í ESB. Þessi alþjóðakreppa mun sennilega spilast svona.

1. Skrúfa fyrir fjármagn og koma bönkum í vandræði. (komið)

2. Fá ríki til að setja allt sem þau eiga, og meira, inn í bankana. Sjá til þess að ríki heimsins eigi enga varasjóði og að yfirdrátturinn sé í botni. (komið)

3. Hér kemur seinni aldan yfir. Þar sem rikin eiga enga peninga eftir, koma bankarnir til hjálpar. Bankarnir sem komu þessu af stað hjálpa ríkjunum að fjármagna kreppuna. Þetta mun gera það að verkum að bankarnir koma sem sigurvegarar út úr kreppunni. Stórfyrirtæki munu stjórna heiminum. Plutocracy, ekki democracy.

En jú, enginn verður drepinn nema kannski í sjálfsvörn á degi friðar, svo við getum sest fyrir framan sjónvarpið, horft á einhvern "skemmtiþátt" og sofið svefni hinna réttlátu því það var friður í heiminum í dag. 

Enginn hernaður á Friðardaginn

Framfarir

Það sér hver maður að þessar línur munu bæta líf suðurnesjamanna, auka hagvöxt landsins og svo eru þær eins og peningalyktin. Ekki kannski fallegar þannig séð, en maður veit að þær eru að vinna fyrir mann. Þarna streymir skínandi gull.

Verst að gullið endar oft í erlendum vösum. Það mun aukast.

Annars eru framfarir eins, skuggi annars.

 

Birt án leyfis en vona að höfundi sé sama. Sjá hér: http://www.skyscrapercity.com/showthread.php?t=554486 

Verulega neikvæð áhrif vegna lagningar Suðvesturlína

Þeir fylgjast með...

Kunningi kunningja míns spáir töluvert í samsæriskenningar, CFR, Bilderberg hópinn, Illuminati, Rockefeller, Rothschild og allt það. Hann var í búð um daginn, valdi sér bók um eitthvað af ofngreindum málefnum og fór að kassanum til að borga. Hann tók upp debet kortið, en var snarlega stoppaður af afgreiðslumanninum. "Ef þú kaupir þessa bók með korti, verða send skilaboð í einhvern gagnagrunn og það verður fylgst með þér." Hann var með seðla á sér og borgaði þannig.

Ekki veit ég hvort það sé satt að rauð pera fari að blikka við hliðina á nafninu hans, en tæknilega er ekkert sem kemur í veg fyrir svona persónunjósnir. Holland er líka fæðingastaður Bilderberg hópsins og mikið af elítunni kemur héðan. Það fær mann allavega til að hugsa, þegar félag stórmarkaða fer að tala um að hætta að taka við peningum árið 2013. Þeir vilja bara kort. Af hverju? Af því að þannig er ekki hægt að ræna þá, er sagt. Hin hliðin er að þá er hægt að fylgjast með hvað þú étur, drekkur og reykir. Tryggingarfélagið gæti hugsanlega neitað að bæta þér vinnutap því þú kaupir kassa af bjór og reykir átta pakka í viku og étur þrjú Snickers á dag. Þar að auki borðar þú afskaplega lítið af grænmeti.

Allavega, nú er ég sennilega kominn á einhvern lista einhversstaðar eftir fyrstu setningu færslunnar.

Forsetinn geti lokað Netinu

Hverjum er ekki sama?

Það er næstum sama hvar í heimi er, stjórnvöld eru spillt og bera enga virðingu fyrir plebbunum. Sagan af fréttamönnunum er ekkert leyndarmál. Ef dauði þeirra var slys, er Hallgrímskirkjan súkkulaðibúðingur með piparsósu.

Stuttu fyrir innrás Indónesíu var bandaríkjaforseti í heimsókn. Áður en hann kom í heimsókn, voru indónesísk yfirvöld beðin um að bíða með innrásina þangað til forsetinn væri farinn. Annars liti þetta svo illa út fyrir Bandaríkin. Góða Heimsveldinu var skítsama um íbúa Austur-Tímor. Þau vildu bara koma í veg fyrir "bad PR".

Fréttamennirnir sem fréttin fjallar um voru teknir höndum af indónesum. Þeir voru stimplaðir njósnarar og pyntaðir til dauða. (viðkvæmir geta hætt að lesa hér) Þeir voru hengdir upp á fótunum. Limirnir voru skornir af þeim og troðið upp í kok svo að þeir köfnuðu. Síðan voru líkin brennd.

Þetta heyrði ég fyrir 15 árum. Þetta er enginn nýr sannleikur. Þetta er saga sem hefur verið þekkt í tæp 35 ár. En pólitíkin er þannig að sumt er ekki nógu spennandi. Sumt tölum við ekki um. Sigurvegarinn skrifar söguna og við trúum því sem okkur er sagt.

Þetta er spilltur heimur og yfirleitt er okkur skítsama um það. Þetta er óréttlátur heimur, en við höfum ekki tíma til að láta það koma okkur við nema óréttlætið beinist að okkur sjálfum.

Blaðamenn voru pyntaðir

Ekki skjóta fótinn

Það var fyrirsjáanlegt að Þráinn myndi kjósa með ESB aðild. Ég kalla þetta aðild því við erum að hefja inngönguferli. Maður fer ekki í svona viðræður nema vera alvara.

Það sem var minna fyrirsjáanlegt var að hann skyldi fara í fýlu yfir því að hinir þrír þingmennirnir kysu eftir eigin sannfæringu, en ekki hans. Það er misskilningur eða útúrsnúningur að segja að Borgarahreyfingin hafi haft ESB aðild í stefnuskránni. Sannleikurinn er að flokkurinn hefur enga opinbera stefnu í ESB málum.

Allir þingmenn Borgarahreyfingarinnar kusu eftir eigin samvisku. Í mínum augum er þetta sterkur flokkur. Ég vona að Þráinn fari ekki að skemma fyrir.

Fréttaskýring: Jaðrar við klofning í þinghópi borgaranna

Vegna umsóknar um pláss...

Velkomin inn í hinn staðlaða heim ESB þar sem allir sitja prúðir í sínum staðlaða kassa, kaupa staðlað grænmeti*, lesa staðlaðar leiðbeiningar og keyra á stöðluðum hámarkshraða. Inngönguferlið er líka staðlað. Ekki útgönguferlið þó. Okkur hefur ekki komið saman um hvernig best er að segja sig úr ESB og höfum því enga staðla þar að lútandi. Þar til svo verður, er ekki hægt að segja sig úr sambandinu. Við biðjumst afsökunar á öllu ónæði sem kann að verða að þessu, en erum viss um að fulllur skilningur ríki meðal þegna vors.

Við í ESB skiljum að þið séuð öðruvísi en aðrar þjóðir, en allar þjóðir eru örlítið öðruvísi en aðrar. Þar af leiðandi höfum við þurft að staðla háttarlag, umbúðir og allt sem fólk gerir, kaupir og segir svo að okkur komi saman. Það er ekki einfalt mál að láta 27 þjóðir með mismunandi menningu og sögu syngja sama sönginn, en það hefur þó tekist með því að staðla allt. Enginn er fyllilega ánægður með lífið í ESB, en enginn er neitt sérstaklega óánægður heldur. Lífið er bara eins og það er og ef þú ert ósammála, getur þú fyllt út eyðublað og málið verður tekið fyrir við fyrsta tækifæri.

Ég veit að þið viljið sér meðferð, þið viljið halda fiskinum og orkunni og öllu því. Við skiljum þetta allt saman og munum reyna allt sem við getum til að hjálpa ykkur, svo framarlega sem það snertir ekki við stöðlunum okkar.

Það hjálpar ykkur auðvitað ekki að koma svona skríðandi á hnjánum. Þið hefðuð átta að koma þegar allt var í gúddí (orði eytt, stenst ekki staðlaða málfræði, vinsamlega breyta). Þið hefðuð ekki átt að setja ykkur svona upp á móti okkur. Og regla númer 1 2 og 3, ekki pirra Þýskaland, Bretland eða Frakkland. Í þessari röð.

Annars óskum við ykkur til hamingju og hlökkum til að ræða málin á þar til gerðum eyðublöðum sem fást á skrifstofum Alsherjarnefndar ESB í Brussel. Þau kosta 20.000 evrur og óskast fyllt inn í þríriti. Tekið er fram að fylla þarf inn eitt eyðublað fyrir hvern íbúa Íslands, tvö ef um börn innan 12 ára aldurs er að ræða, eða fólk komið á eftirlaun. Ekki er nauðsynlegt að fylla inn eyðublöð fyrir fólk á aldrinum 25-35 ára með lán sem nema 2.5 sinnum árstekjum, því það mun flytja frá Íslandi innan fimm ára.

Bestu kveðjur frá ESB 

*Athugið að nýlega var ESB reglum um grænmeti breytt. Agúrkur þurfa ekki lengur að vera teinréttar. Æskilegt er þó að þær séu ekki bognari en sem svarar 27° og séu jafn sverar frá einum enda til annars, nema endarnir sjálfir, sem teljast vera 7.5% heildarlengdar gúrkunnar. Tómatar í einni pakkningu mega nú vera misstórir, þó má ekki muna meira en 12% í þyngd á léttasta og þyngsta. Þeir skulu allir hafa sama pantone gildi (lit).

Umsókn metin á staðlaðan hátt