Borgar sig að gefa út á netinu?

Eins og margir vita er ég að gera svipaða tilraun og Radiohead. Eftir því sem ég best veit er dæmið að ganga vel hjá þeim félögum. Spurningin er þó, virkar þetta bara ef maður er frægur eða er þetta framtíðin fyrir alla sem eru að búa til frumsamið efni, tónlist eða kvikmyndir?

Ég setti stuttmyndina Svartan Sand á netið fyrir tæpri viku. Hún hafði verið sótt 732 sinnum fyrr í dag. Eins og fram kemur í athugasemdum við fyrri færslu er hún líka komin inn á nýja íslenska torrent síðu. Ég hef ekki aðgang að henni, svo ég get ekki sagt um hvað er að gerast þar.

Átta manns hafa borgað fyrir myndina, rúmt eitt prósent. Það segir þó ekki alla söguna, því margir hafa sennilega ekki enn haft tækifæri til að sjá hana. Einnig hafa verið gerðar athugasemdir við að einungis er hægt að nota greiðslukort eða PayPal. Væri hægt að millifæra beint í heimabanka myndu fleiri geta borgað.

Ég hef sett inn nýja skoðanakönnun þar sem fólk getur látið vita. Komi í ljós að fólk vill frekar greiða fyrir myndina með millifærslu, mun ég bæta þeim möguleika við.

Af einhverjum ástæðum get ég bara haft eina skoðanakönnun inni í einu, svo sú fyrri þar sem spurt var um álit fólks á myndinni verður sett inn aftur þegar þetta mál er farið að skýrast. 

Takk fyrir áhugann! 

Radiohead tilkynnir tónleikaferð um Evrópu

Athugasemdir

[Gullvagninn (IP-tala skráð) 7.12.2007 kl. 00:10]

eitt prósent hljómar lágt, las einhverstaðar að menn giskuðu á að 38% af radiohead dl hefði verið greitt fyrir - að vísu að meðaltali 4$, en samt greitt eitthvað. 

[Jórunn Sigurbergsdóttir , 7.12.2007 kl. 12:27]

Það greiðsla á leiðinni frá mér. Munar kannski ekki miklu. En þú ert nú að gera eitthvað sem ekki hefur verið gert áður, nema hjá frægum eins og þú segir svo kannski tekur þetta tíma. Þú hefur sem betur fer samt vakið athygli. Svo vonandi er þetta byrjun.

En að örðu. Ef ég man rétt átt þú að geta stillt einhverstaðar hve margar kannanir þú villt hafa. Það gerði ég einu sinni. Nú man ég ekki hvar en kíktu eftir þessu.  

[Villi Asgeirsson, 7.12.2007 kl. 14:40]

Það munar um allt. Myndin kostaði rúmar 350.000 krónur. Ef þetta endar með 2000 niðurhölum og allir myndu borga 200kr. væri búið að borga myndina. Það væri ekki hægt að túlka það öðruvísi en sigur fyrir þá sem hafa áhuga á svona dreifingu og skráaskiptum. Það munar því um hvern hundraðkall.

Ef 38% borguðu 4 evrur fyrir myndina, værum við komin í tæpar 800 evrur, 20% af heildarkostnaði. Ekki slæmt eftir tæpa viku. Það er hins vegar, enn sem komið er, ekki raunin. Tilraunin heldur því áfram.

[Nanna Katrín Kristjánsdóttir, 7.12.2007 kl. 14:47]

Já það hlýtur að verða framtíðin, videoleigur eða að kaupa myndir út í búð er að verða úrelt.  Með auknum internethraða er þetta komið til að vera.  Nú er bara spurning að finna nýja leið til að græða á netinu.  Það væri hægt að rukka eins og þú nefndir eða jafnvel auglýsa ef síðan hefur margar heimsóknir.

[Anna Brynja (IP-tala skráð) 7.12.2007 kl. 20:49]

Þetta væri kannski að ganga betur ef það væri meira gengið út frá því að þú réðir algjörlega hvað þú borgaðir. Og að sama hversu lágar upphæðirnir væri þá væru þær að hjálpa í raun...

Ef þú vildir myndina á DVD þá væri í lagi að hafa eitthvað fast verð, enda mér þætti það eðlilegt, og örugglega flestum. Þá værir þú kannski kominn með fleiri 200 kalla ...

Ég held það sé ekki spurning um að hafa möguleikann á millifærslu til staðar, sérstaklega ef þú getur fiffað íslenskan reikning. Meðal Jón og Gunna í dag fara örugglega daglega á heimabankann sinn svo það væri voðalega þægileg leið ...

Kveðja,

Anna Brynja 

[Villi Asgeirsson, 7.12.2007 kl. 23:10]

Spurning hvort maður hafi ekki verið nógu skýr. Ég er jafn grænn í þessu og hver annar, því þetta er svo nýtt. Eins og Anna Brynja segir eru öll framlög velkomin, hversu smá sem þau eru. Það eins sem breytist við 12 evru mörkin er að ég sendi viðkomandi DVD. Vilji fólk hins vegar styrkja framtakið og hjálpa til við að gera þessa dreifingaraðferð að raunverulegum valkosti í framtíðinni, er því velkomið að leggja til 100 kall, 200 kall eða hvað sem því sýnist.

Ég skal fara í að skoða heimabankadæmið.