Ruglukollar í hvítum sloppum ... burt með spillingarliðið

Leiðtogar töluðu og komust ekki að niðurstöðu um neitt nema að komast að niðurstöðu seinna. Hef ég heyrt þetta áður? Nei. Nei, ekki heyrt þetta áður.

Það á að draga lærdóm af. Lærdóm sem átti að draga af kreppunni upp úr 1929, hruninu 1987, netbólunni sem sprakk. Þð á alltaf að draga lærdóm, en á meðan græðgin er óheft lærum við ekkert.

Og þó. Kannski var einhver tilraun í gangi og við erum rotturnar.

Leiðtogarnir vilja auðvitað standa saman svo að allt fari ekki til gauksins með klær og hala. Allir standa saman á meðan ekki er étin sneið úr þeirra köku. Allir standa saman og gleyma litlu fíflunum á stóru bílunum á litlu eyjunni langt, langt í burtu.

Því enginn vill tapa spæninum úr sínum aski, hvað sem það kostar hina. 

Gripið til nauðsynlegra aðgerða til að tryggja stöðugleika

Ósáttur? ... burt með spillingarliðið

Er Gunnar ósáttur við að einhver skuli segja eitthvað um eitthvað sem þeir geta ekki tjáð sig um því það er trúnaðarmál en við megum samt borga brúsann?

I got news for ya, pal. Á meðan skítugir og heimskir alþýðuaumingjar eru nógu góðir til að taka fram veskið og borga fylleríið, má bara alveg sleppa þessu trúnaðarmálarugli. Vér erum orðin þreytt á potintátum með silkibindi sem eru svo æðislegir að þeir nenna ekki að tala við okkur litlu aumingjana því við erum svo heimsk og myndum ekki skilja raðskatt hvort eð er.

Eitt enn. Var þessi Gunnar í einhverri áhrifastöðu hjá gamla Glitrófinu? Ég spyr því ég nenni ekki að gúggla það. Sé það svo, má hann bara eiginlega soldið segja af sér eða í besta falli sleppa því að vera ósáttur. Það hafa aðrir meiri ástæðu til að vera ósáttir.

PS. "burt með spillingarliðið" er átak einhverra bloggara. Við bætum þessu við titla til að minna fólk á að við viljum spillingarliðið burt.   

Glitnir keypti ekki í Baugi

Svona 230 manns ... og burt með spillingarliðið!

"Þarna var ekki nema svona 230 manns í mesta lagi", samkvæmt fréttatilkynningu Sannleiksmálaráðuneytisins. "Það voru einhverjir stúdentar þarna og svo kallinn sem sefur alltaf á bekknum. Hann rumskaði víst þegar liðið fór að syngja internationalinn, en snéri sér á hina hliðina og hraut í takt".

Þetta er svo fyndið. Bónusfáninn á Alþingishúsið. Ætli alvara málsins sé farin að síjast inn hjá ráðamönnum? Ég hefði gefið mikið fyrir að vera þarna, en alas... Gott samt að vita að fólk er að láta vita af sér.

Hiti í mönnum

Sauðina heim ... og burt með spillingarliðið

Það lýtur út fyrir fólksflótta af landinu á næstu mánuðum. Það mun aðeins gera stöðuna erfiðari fyrir ríki og sveitarfélög. En þarf það endilega að vera svoleiðis?

Það er mikill auður í íslendingum erlendis. Það búa einhverjar þúsundir um allan heim. Þeir hafa það flestir sameiginlegt að hafa ekki tekið þátt í svallinu, vera ekki með milljónalán hangandi yfir hausnum og að hafa "alist upp" í allt öðru umhverfi. Þeir hafa lært siði síns lands, siði sem við getum sjálfsagt lært af. Þetta er yfirleitt vel menntað fólk.

Hvernig væri ef ríkið eða sveitarfélög hjálpuðu týndu sauðunum að koma heim aftur? Það vita allir að íslendingar erlendis eru alltaf á leiðinni.

1. Hafi viðkomandi sín mál á hreinu í viðkomandi landi, fær hann einhvers konar ríkisábyrgð. Hana er hægt að nota til að taka húsnæðislán í gjaldeyri viðkomandi lands.

2. Sauðurinn millifærir lánið yfir á gjaldeyrisreikning heima, kaupir íbúð á Íslandi og selur erlendu eignina*.

3. Sauðurinn flytur heim, borgar ábyrgðaraðila og lætur gott af sér leiða.

*Það er ekki sjálfgefið að hús seljist strax. Þess vegna er hjálp ríkis eða sveitarfélaga nauðsynleg. Fæstir geta borgað af tveimur húsnæðislánum í einu. Þess vegna myndi ábyrgðaraðili greiða af nýja láninu þar til eldri eign er seld. Þessum afborgunum yrði svo bætt ofan á höfuðstól þess láns sem eftir er.

Þetta kostar ríkið því ekkert, því allt er endurgreitt að lokum. Fólk sér sér fært að flytjast heim án þes að taka áhættu sem getur steypt því í gjaldþrot. Gjaldeyrir kemur í töluverðu magni inn í landið. Það þarf ekki nema 10 fjölskyldur til að koma u.þ.b. 250 milljónum hingað, 100 fjölskyldur gera 2.5 milljarða og svo framleiðis.

Þetta er gróf hugmynd, svo það væri gaman að heyra hvað fólki finnst.

 

PS. "burt með spillingarliðið" er átak einhverra bloggara. Við bætum þessu við titla til að minna fólk á að við viljum spillingarliðið burt.  

Endurgreiða 2,5 milljarða

Allar hliðar skoðaðar og þetta líka... og svo burt með spillingarliðið!

Ég ætla að blogga út frá fyrirsögninni, ekki fréttinni. Ég nenni nebblekki að leika hagfræðiprófessor í bili.

Því svo bar til um þær mundir að ég fór að dullast í kvikmyndagerð. Gangi allt eftir, klára ég handritið að Undir Svörtum Sandi fyrir jól. Ef allt fer ekki í rugl kem ég svo að taka hana upp í sumar. En þetta er auðvitað bara ein mynd. Allir eru að gera bara eina mynd af og til. Þeir duglegustu rembast kannski við að verpa einu eggi á 2-3 ára fresti. Eggið er svo gullið að það stendur aldrei undir sér, svo styrki þarf til. Þetta er auðvitað handónýtt. Maður fékk útrás fyrir sköpunarkláðann og allir geta verið stoltir af því að við íslendingar séum svo æðisleg, en þetta stendur ekki undir sér. Ekki gott þegar allir eru á hausnum.

Ég var veikur í gær og er enn ekki búinn að jafna mig. Ligg þó ekki lengur á sófanum í hálfgerðu móki á milli ælukasta, svo þetta er allt í áttina. Ég notaði timann og horfði á Casablanca, klassíkina með ofurtöffaranum Bogart og hinni ofurfallegu Ingrid Bergman. Þetta er tvöfaldur viðhafnarDVD og ég lét mig hafa það að skoða aukaefnið á seinni diskinum. Þar var farið í líf Hömpa og gamla stúdíókerfið í Hollywood þar sem myndunum var dælt út. Ein mynd frumsýnd í viku. Ég fór að hugsa.

Við eigum ekkert að vera að vesenast í þessum Títanik myndum, allavega ekki bara. Ef einhver á stofnfé handa mér vil ég setja upp fyrirtækið "10". Það myndi pumpa út 10 kvikmyndum á ári og ekki setja meira en 10 milljónir í hverja mynd. Þetta er auðvitað bráðsnjöll hugmynd og framkvæmanleg. Allir eru atvinnulausir og heimta ekki tíuþúsundkall á tímann. Við værum ekkert að vesenast í að byggja rosalegar leikmyndir. Handritin yrðu skrifuð þannig að staðir sem eru til yrðu notaðir. Það má nota eitthvað af tæknibrellum ef þær kosta ekki milljónir á pixel og klessa einstaka bíl ef hann er ekki of dýr. Það væri hægt að gera spennumyndir, gamanmyndir, drama og hvað sem er. Það sem öllu máli skiptir er að handritin yrðu góð.

Ef kostnaður er ekki yfir 10 milljónir á mynd ætti þetta að standa undir sér því myndirnar yrðu sýndar í bíó, sjónvarpi og færu á DVD. 

Er ekki einhver til í þetta?  

Allar hliðar séu skoðaðar

Ó boí ... burt með spillingarliðið

Loksins kemur svona hálfsæmilega þokkaleg frétt og hun er staðfest að einhverri konu hjá fjármálaráðuneytinu pólska, en þá kemur Geir af fjöllum. Ég geri ráð fyrir því að hann viti hvað er í gangi. Hafi þetta farið fram hjá honum, hefur hann örugglega farið fyrst í fjármálaráðuneytið íslenska og spurst fyrir. Hefði hann ekki átt að hringja til Póllands og tala við Magdalenu áður en hann skellir þessu í blöðin? Maður er nebbla orðinn svo þreyttur á fréttum sem eru út um allan völl. Hann segir nebbla nei meðan hún segir já og við erum engu nær um hvaðan misskilningurinn er sprottinn.

Ó vell. Fastir liðir eins og venjulega.

 

 PS. "burt með spillingarliðið" er átak einhverra bloggara. Við bætum þessu við titla til að minna fólk á að við viljum spillingarliðið burt. 

Kannast ekki við pólskt lán

Skemmtilegt framtak ... burt með spillingarliðið

Þetta er stórskemmtileg hugmynd. Enn og aftur segi ég, ef ég væri á landinu... þetta er að verða alvarlegt. Verð ég ekki að fara að plana endurkomu? Mig langar að kaupa listaverk á 5000 kall, mig langar á borgarafundinn í Iðnó, mig langar að byggja upp nýtt og betra samfélag. Mig langar að vera á staðnum svo ég geti byggt upp síðuna Nýja Ísland. Mig langar svo margt.

Í fyrradag minntist ég á hugmynd sem ég fékk. Mig langar að gera kvikmynd um lífið í kjölfar hrunsins. Mér datt í hug að hún gæti orðið fjölskyldudrama. Rakel lét sér detta í hug að gera einhverskonar háðsádeilu um ástandið, sem ég held að gæti verið skemmtilegt verkefni. Gullvagninn kom svo með þá hugmynd að gera samsærismynd um þá sem að baki hruninu standa. Það er sjálfsagt full þörf á að kafa svolítið ofan í það og gera mynd. Kíkið endilega á þá færslu og látið heyra frá ykkur.

Svo er það stóra fréttin frá því í sumar sem er orðin svo lítil í samanburði við allt. Uriah Heep hljómleikarnir verða teknir upp á fimmtudag og föstudag. Maður hefur þá eitthvað að gera hér í afdalarassgatinu Hollandi.

 

PS. "burt með spillingarliðið" er átak einhverra bloggara. Við bætum þessu við titla til að minna fólk á að við viljum spillingarliðið burt. 

Selja verk á 5.000 krónur

Kommon! og burt með spillingarliðið!

Ég ætla ekki að tala um tónlist eða karakter Bubba. Ég ætla ekki að spekúlera um það hvort tónlist geti breytt heiminum. En kommon!

Það vantar eina og hálfa milljón upp á að dæmið gangi upp. Á borgin það ekki til?

Hver svo sem staða borgarsjóðs er, geta þau að minnsta kosti druslast til að svara. Nei er betra en ekkert. Við vitum þá allavega hvað við höfum þau. Við vitum það svo sem, því þögnin er hávær. 

PS. "burt með spillingarliðið" er átak einhverra bloggara. Við bætum þessu við titla til að minna fólk á að við viljum spillingarliðið burt.

Ekkert svar við styrkumsókn Bubba

Hrunið - kvikmynd um fall Íslands : og burt með spillingarliðið!

Ég er að ljúka við gerð handrits sem ég vonast til að geta kvikmyndað í sumar. Mundin Undir Svörtum Sandi verður lauslega byggða á næstum því samnefndri stuttmynd. Þar sem þessi skrif eru að klárast, væri gaman að finna sér nýtt viðfangsefni.

Mér var að detta í hug að gera myndina Hrunið. Kannski að titillinn breytist eftir því sem sagan þróast. Myndin ætti að fjalla um íslenskan raunveruleika í kjölfar bankahrunsins. Hér er hugmynd.

Pabbi rekur lítið fyrirtæki og mamma er kennari. Skuldir fyrirtækisins verða óyfirstíganlegar og það fer á hausinn. Húsið og bílarnir missa verðgildi sitt meðan lánin rjúka upp. Mamma reynir að halda heimilinu gangandi, en það gengur illa á kennaralaununum. Pabbi reynir að sinna heimilisverkum þegar hann er ekki að leita sér að vinnu, en finnur út að hann er alveg hand ónýt húsmóðir. Þetta ástand hefur auðvitað hrikalegar afleiðingar. Táningarnir tveir skilja ekki hvers vegna þau geta ekki haldið áfram að eyða peningum og þar kemur enn ein togstreytan.

Pabbi var víst ekki alveg þar sem hann var séður. Fljótlega fer síminn að hringja og miður skemmtilegir menn fara að láta sjá sig. Þegar jeppinn fuðrar upp í innkeyrslunni, fer allt endanlega í hundana. Kannski að unglingarnir finni á sér nýja hlið og berjist við vondu kallana.

Ég get svo sem hóstað þessu upp, en það væri alveg ofboðslega skemmtilegt ef þetta yrði samvinnuverkefni. Ef fólk gerði athugasemdir, kæmi með persónur og atburði. Það væri gaman að sjá hvort hægt væri að þróa handritið hér á blogginu. Það sem ég skrifa hér að ofan er bara hugmynd. Handritið gæti þróast í allt aðra átt.

Látið endilega vita hvað ykkur finnst og sjáum hvort við getum gert kvikmynd allra landsmanna! 

Er hálfur sannleikur betri en enginn?

Auðvitað bera stjórnvöld ábyrgð á ástandinu, en aðeins að hluta. Sofandaháttur og pólitík stjórnvalda, bankarnir og lánasukk almennings kom okkur í þessa stöðu. Stjórnvöld verða að gera sitt besta til að koma okkur út úr þessu, en við berum öll ábyrgð og verðum öll að leggja okkar á skálarnar. Þá á ég ekki síst við fyrirtækin í landinu, sem mörg virðast frekar reyna að græða á ástandinu, en að hjálpa til.

Orkufrek stóriðja er alls ekki lausnin. Virkjanir kalla á enn meiri erlenda skuldsetningu, sem er það síðasta sem við þurfum. Það skapast fá störf miðað við kostnað og framkvæmdir sem fara ekki af stað fyrr en eftir 2-3 ár í fyrsta lagi munu ekki laga neitt, því við þurfum aðgerðir sem virka strax. Það eina sem getur komið í veg fyrir atvinnuleysi er ef hlúið er að sprotafyrirtækjum og öðrum sem þegar eru á markaðnum og ef ríki og sveitarfélög fara út í mannfrekar aðgerðir, svo sem vegagerð, viðhald á opinberum byggingum og öðru sem ekki hefur verið tími eða peningur fyrir.

Það síðasta sem við þurfum eru frekari erlend lán. 

Segir stjórnvöld ábyrg