Þurfum við lán? ... burt með spillingarliðið!

Mér skilst að ríkissjóður sé ennþá skuldlaus, þrátt fyrir allt. Það séu bankarnir sem sitji með skuldirnar og vonast sé til að þeir eigi eignir á móti. Mér skilst að við þurfum ekki að borga meira en það sem var til í tryggingasjóði. Til hvers þurfum við þá sex milljarða dollara lán, sem eru 775 milljarðar króna, 2.5 milljónir á hvern mann, konu og smábarn?

Það virðist vera þannig að við þurfum eiginlega ekkert að nota þennan gjaldeyri. Þetta sé bara svona einhvers konar öryggissjóður til að tryggja krónuna þegar hún fer á flot. Þetta skilst mér á því sem ráðamenn og mér lesnari menn segja. Mér skilst líka að það sé alvöru hætta á að krónunni sé ekki treyst og að þessi lán muni brenna upp við flotið. Þá hef ég bara eina spurningu.

Þurfum við að setja krónuna á flot? Eigum við ekki bara að gleyma henni? Ég hef látið telja mér trú um að Seðlabankinn eigi nógu mikið af evrum til að skipta út öllum krónum sem eru í umferð. Megnið af okkar fjármagni eru bara tölur í tölvu, svo seðlamagn skiptir tiltölulega litlu máli. Það sem þyrfti að gerast er að gengi krónunnar yrði ákveðið og svo yrði öllu skipt. Fólk gæti skipt út krónunum á sex mánaða tímabili. Það yrði ekkert gengishrun í kjölfar flotsins, engin erlend lán sem hyrfu í verðbólgubáli, myntkörfulán íslendinga myndu jafna sig, verðtrygging yrði óþörf.

Ég hef alltaf verið harður stuðningsmaður krónunnar og ekki viljað sjá neitt annað á mínu ástkæra Íslandi, en ég er ekki viss um að við höfum efni á að halda henni. 

Enn vantar 5 milljarða Bandaríkjadala

Allt það versta ... burt með spillingarliðið

Ríki og sveitarfélög eru frábrugðin venjulegum fyrirtækjum. Þeim ber að tryggja stöðugleika eins og hægt er. Þessi ákvörðun Garðabæjar er arfavitlaus og mun koma í hausinn á þeim, eða öðrum. Atvinnulausir gera engum gagn, þeir kosta þjóðfélagið pening í formi bóta og eiga á hættu að verða andlega veikir ef ástandið endist eitthvað. Maður sem hefur verið atvinnulaus í einhverja mánuði á oft erfitt með að fara aftur út á vinnumarkaðinn þegar vinna býðst.

Þetta er ekki tími fyrir niðurskurð í opinberum framkvæmdum. Þvert á móti, á að setja allt í gang svo að ástandið haldist eins eðililegt og hægt er. 

Skólabyggingum frestað í Garðabæ

Hverju breytir það í Hollandi? ... burt með þetta spillingarlið!

Þessi blessaði forstjóri Fjármálaeftirlitsins bendir á fjármálaráðherra og segir að hann hafi vitað að veseni Icesave í vor. Gott og vel. Það þarf sjálfsagt að moka undan Björgvin eins og öðrum. En það breytir ekki að þessi forstjóri með óflekkaðan flipa blessaði opnun Icesave í Hollandi í júní, nokkrum mánuðum seinna.

Þeir geta bent á hvorn annan, en þeir eru allir sekir! 

FME: Upplýsti ekki ráðherra

Ruglukollar í hvítum sloppum ... burt með spillingarliðið

Leiðtogar töluðu og komust ekki að niðurstöðu um neitt nema að komast að niðurstöðu seinna. Hef ég heyrt þetta áður? Nei. Nei, ekki heyrt þetta áður.

Það á að draga lærdóm af. Lærdóm sem átti að draga af kreppunni upp úr 1929, hruninu 1987, netbólunni sem sprakk. Þð á alltaf að draga lærdóm, en á meðan græðgin er óheft lærum við ekkert.

Og þó. Kannski var einhver tilraun í gangi og við erum rotturnar.

Leiðtogarnir vilja auðvitað standa saman svo að allt fari ekki til gauksins með klær og hala. Allir standa saman á meðan ekki er étin sneið úr þeirra köku. Allir standa saman og gleyma litlu fíflunum á stóru bílunum á litlu eyjunni langt, langt í burtu.

Því enginn vill tapa spæninum úr sínum aski, hvað sem það kostar hina. 

Gripið til nauðsynlegra aðgerða til að tryggja stöðugleika

Ósáttur? ... burt með spillingarliðið

Er Gunnar ósáttur við að einhver skuli segja eitthvað um eitthvað sem þeir geta ekki tjáð sig um því það er trúnaðarmál en við megum samt borga brúsann?

I got news for ya, pal. Á meðan skítugir og heimskir alþýðuaumingjar eru nógu góðir til að taka fram veskið og borga fylleríið, má bara alveg sleppa þessu trúnaðarmálarugli. Vér erum orðin þreytt á potintátum með silkibindi sem eru svo æðislegir að þeir nenna ekki að tala við okkur litlu aumingjana því við erum svo heimsk og myndum ekki skilja raðskatt hvort eð er.

Eitt enn. Var þessi Gunnar í einhverri áhrifastöðu hjá gamla Glitrófinu? Ég spyr því ég nenni ekki að gúggla það. Sé það svo, má hann bara eiginlega soldið segja af sér eða í besta falli sleppa því að vera ósáttur. Það hafa aðrir meiri ástæðu til að vera ósáttir.

PS. "burt með spillingarliðið" er átak einhverra bloggara. Við bætum þessu við titla til að minna fólk á að við viljum spillingarliðið burt.   

Glitnir keypti ekki í Baugi

Sauðina heim ... og burt með spillingarliðið

Það lýtur út fyrir fólksflótta af landinu á næstu mánuðum. Það mun aðeins gera stöðuna erfiðari fyrir ríki og sveitarfélög. En þarf það endilega að vera svoleiðis?

Það er mikill auður í íslendingum erlendis. Það búa einhverjar þúsundir um allan heim. Þeir hafa það flestir sameiginlegt að hafa ekki tekið þátt í svallinu, vera ekki með milljónalán hangandi yfir hausnum og að hafa "alist upp" í allt öðru umhverfi. Þeir hafa lært siði síns lands, siði sem við getum sjálfsagt lært af. Þetta er yfirleitt vel menntað fólk.

Hvernig væri ef ríkið eða sveitarfélög hjálpuðu týndu sauðunum að koma heim aftur? Það vita allir að íslendingar erlendis eru alltaf á leiðinni.

1. Hafi viðkomandi sín mál á hreinu í viðkomandi landi, fær hann einhvers konar ríkisábyrgð. Hana er hægt að nota til að taka húsnæðislán í gjaldeyri viðkomandi lands.

2. Sauðurinn millifærir lánið yfir á gjaldeyrisreikning heima, kaupir íbúð á Íslandi og selur erlendu eignina*.

3. Sauðurinn flytur heim, borgar ábyrgðaraðila og lætur gott af sér leiða.

*Það er ekki sjálfgefið að hús seljist strax. Þess vegna er hjálp ríkis eða sveitarfélaga nauðsynleg. Fæstir geta borgað af tveimur húsnæðislánum í einu. Þess vegna myndi ábyrgðaraðili greiða af nýja láninu þar til eldri eign er seld. Þessum afborgunum yrði svo bætt ofan á höfuðstól þess láns sem eftir er.

Þetta kostar ríkið því ekkert, því allt er endurgreitt að lokum. Fólk sér sér fært að flytjast heim án þes að taka áhættu sem getur steypt því í gjaldþrot. Gjaldeyrir kemur í töluverðu magni inn í landið. Það þarf ekki nema 10 fjölskyldur til að koma u.þ.b. 250 milljónum hingað, 100 fjölskyldur gera 2.5 milljarða og svo framleiðis.

Þetta er gróf hugmynd, svo það væri gaman að heyra hvað fólki finnst.

 

PS. "burt með spillingarliðið" er átak einhverra bloggara. Við bætum þessu við titla til að minna fólk á að við viljum spillingarliðið burt.  

Endurgreiða 2,5 milljarða

Allar hliðar skoðaðar og þetta líka... og svo burt með spillingarliðið!

Ég ætla að blogga út frá fyrirsögninni, ekki fréttinni. Ég nenni nebblekki að leika hagfræðiprófessor í bili.

Því svo bar til um þær mundir að ég fór að dullast í kvikmyndagerð. Gangi allt eftir, klára ég handritið að Undir Svörtum Sandi fyrir jól. Ef allt fer ekki í rugl kem ég svo að taka hana upp í sumar. En þetta er auðvitað bara ein mynd. Allir eru að gera bara eina mynd af og til. Þeir duglegustu rembast kannski við að verpa einu eggi á 2-3 ára fresti. Eggið er svo gullið að það stendur aldrei undir sér, svo styrki þarf til. Þetta er auðvitað handónýtt. Maður fékk útrás fyrir sköpunarkláðann og allir geta verið stoltir af því að við íslendingar séum svo æðisleg, en þetta stendur ekki undir sér. Ekki gott þegar allir eru á hausnum.

Ég var veikur í gær og er enn ekki búinn að jafna mig. Ligg þó ekki lengur á sófanum í hálfgerðu móki á milli ælukasta, svo þetta er allt í áttina. Ég notaði timann og horfði á Casablanca, klassíkina með ofurtöffaranum Bogart og hinni ofurfallegu Ingrid Bergman. Þetta er tvöfaldur viðhafnarDVD og ég lét mig hafa það að skoða aukaefnið á seinni diskinum. Þar var farið í líf Hömpa og gamla stúdíókerfið í Hollywood þar sem myndunum var dælt út. Ein mynd frumsýnd í viku. Ég fór að hugsa.

Við eigum ekkert að vera að vesenast í þessum Títanik myndum, allavega ekki bara. Ef einhver á stofnfé handa mér vil ég setja upp fyrirtækið "10". Það myndi pumpa út 10 kvikmyndum á ári og ekki setja meira en 10 milljónir í hverja mynd. Þetta er auðvitað bráðsnjöll hugmynd og framkvæmanleg. Allir eru atvinnulausir og heimta ekki tíuþúsundkall á tímann. Við værum ekkert að vesenast í að byggja rosalegar leikmyndir. Handritin yrðu skrifuð þannig að staðir sem eru til yrðu notaðir. Það má nota eitthvað af tæknibrellum ef þær kosta ekki milljónir á pixel og klessa einstaka bíl ef hann er ekki of dýr. Það væri hægt að gera spennumyndir, gamanmyndir, drama og hvað sem er. Það sem öllu máli skiptir er að handritin yrðu góð.

Ef kostnaður er ekki yfir 10 milljónir á mynd ætti þetta að standa undir sér því myndirnar yrðu sýndar í bíó, sjónvarpi og færu á DVD. 

Er ekki einhver til í þetta?  

Allar hliðar séu skoðaðar

Ó boí ... burt með spillingarliðið

Loksins kemur svona hálfsæmilega þokkaleg frétt og hun er staðfest að einhverri konu hjá fjármálaráðuneytinu pólska, en þá kemur Geir af fjöllum. Ég geri ráð fyrir því að hann viti hvað er í gangi. Hafi þetta farið fram hjá honum, hefur hann örugglega farið fyrst í fjármálaráðuneytið íslenska og spurst fyrir. Hefði hann ekki átt að hringja til Póllands og tala við Magdalenu áður en hann skellir þessu í blöðin? Maður er nebbla orðinn svo þreyttur á fréttum sem eru út um allan völl. Hann segir nebbla nei meðan hún segir já og við erum engu nær um hvaðan misskilningurinn er sprottinn.

Ó vell. Fastir liðir eins og venjulega.

 

 PS. "burt með spillingarliðið" er átak einhverra bloggara. Við bætum þessu við titla til að minna fólk á að við viljum spillingarliðið burt. 

Kannast ekki við pólskt lán

Kommon! og burt með spillingarliðið!

Ég ætla ekki að tala um tónlist eða karakter Bubba. Ég ætla ekki að spekúlera um það hvort tónlist geti breytt heiminum. En kommon!

Það vantar eina og hálfa milljón upp á að dæmið gangi upp. Á borgin það ekki til?

Hver svo sem staða borgarsjóðs er, geta þau að minnsta kosti druslast til að svara. Nei er betra en ekkert. Við vitum þá allavega hvað við höfum þau. Við vitum það svo sem, því þögnin er hávær. 

PS. "burt með spillingarliðið" er átak einhverra bloggara. Við bætum þessu við titla til að minna fólk á að við viljum spillingarliðið burt.

Ekkert svar við styrkumsókn Bubba

Er hálfur sannleikur betri en enginn?

Auðvitað bera stjórnvöld ábyrgð á ástandinu, en aðeins að hluta. Sofandaháttur og pólitík stjórnvalda, bankarnir og lánasukk almennings kom okkur í þessa stöðu. Stjórnvöld verða að gera sitt besta til að koma okkur út úr þessu, en við berum öll ábyrgð og verðum öll að leggja okkar á skálarnar. Þá á ég ekki síst við fyrirtækin í landinu, sem mörg virðast frekar reyna að græða á ástandinu, en að hjálpa til.

Orkufrek stóriðja er alls ekki lausnin. Virkjanir kalla á enn meiri erlenda skuldsetningu, sem er það síðasta sem við þurfum. Það skapast fá störf miðað við kostnað og framkvæmdir sem fara ekki af stað fyrr en eftir 2-3 ár í fyrsta lagi munu ekki laga neitt, því við þurfum aðgerðir sem virka strax. Það eina sem getur komið í veg fyrir atvinnuleysi er ef hlúið er að sprotafyrirtækjum og öðrum sem þegar eru á markaðnum og ef ríki og sveitarfélög fara út í mannfrekar aðgerðir, svo sem vegagerð, viðhald á opinberum byggingum og öðru sem ekki hefur verið tími eða peningur fyrir.

Það síðasta sem við þurfum eru frekari erlend lán. 

Segir stjórnvöld ábyrg