Sauðina heim ... og burt með spillingarliðið

Það lýtur út fyrir fólksflótta af landinu á næstu mánuðum. Það mun aðeins gera stöðuna erfiðari fyrir ríki og sveitarfélög. En þarf það endilega að vera svoleiðis?

Það er mikill auður í íslendingum erlendis. Það búa einhverjar þúsundir um allan heim. Þeir hafa það flestir sameiginlegt að hafa ekki tekið þátt í svallinu, vera ekki með milljónalán hangandi yfir hausnum og að hafa "alist upp" í allt öðru umhverfi. Þeir hafa lært siði síns lands, siði sem við getum sjálfsagt lært af. Þetta er yfirleitt vel menntað fólk.

Hvernig væri ef ríkið eða sveitarfélög hjálpuðu týndu sauðunum að koma heim aftur? Það vita allir að íslendingar erlendis eru alltaf á leiðinni.

1. Hafi viðkomandi sín mál á hreinu í viðkomandi landi, fær hann einhvers konar ríkisábyrgð. Hana er hægt að nota til að taka húsnæðislán í gjaldeyri viðkomandi lands.

2. Sauðurinn millifærir lánið yfir á gjaldeyrisreikning heima, kaupir íbúð á Íslandi og selur erlendu eignina*.

3. Sauðurinn flytur heim, borgar ábyrgðaraðila og lætur gott af sér leiða.

*Það er ekki sjálfgefið að hús seljist strax. Þess vegna er hjálp ríkis eða sveitarfélaga nauðsynleg. Fæstir geta borgað af tveimur húsnæðislánum í einu. Þess vegna myndi ábyrgðaraðili greiða af nýja láninu þar til eldri eign er seld. Þessum afborgunum yrði svo bætt ofan á höfuðstól þess láns sem eftir er.

Þetta kostar ríkið því ekkert, því allt er endurgreitt að lokum. Fólk sér sér fært að flytjast heim án þes að taka áhættu sem getur steypt því í gjaldþrot. Gjaldeyrir kemur í töluverðu magni inn í landið. Það þarf ekki nema 10 fjölskyldur til að koma u.þ.b. 250 milljónum hingað, 100 fjölskyldur gera 2.5 milljarða og svo framleiðis.

Þetta er gróf hugmynd, svo það væri gaman að heyra hvað fólki finnst.

 

PS. "burt með spillingarliðið" er átak einhverra bloggara. Við bætum þessu við titla til að minna fólk á að við viljum spillingarliðið burt.  

Endurgreiða 2,5 milljarða

Athugasemdir

[Sigbjörn. (IP-tala skráð) 10.11.2008 kl. 20:29]

Hvað með vinnu... Fólk nákomið mér hefur verið að missa vinnuna heima á klakanum og eins og staðan í dag þá mun eitthvað atvinnuleysi koma sem er eitthvað sem ungir íslendingar vita ekki hvað er.

Má ég spyrja, hvaða heilvita maður sem veit hvernig lánakerfið virkar myndi taka húsnæðislán á Íslandi....ekki ég! 

[Villi Asgeirsson, 10.11.2008 kl. 21:21]

Góður punktur. Það er stór hluti þess sem heldur aftur af mér. Hér í Hollandi borga ég bara mín 5% eða hvað það er og búið mál. Heima veit maður það fyrirfram að lánið mun hækka mikið hraðar en húsnæðið, annað hvort vegna gengis eða verðtryggingar.

Það er einhver draumur að koma heim og hjálpa við að byggja landið upp aftur, en á meðan kerfið er eins og það er, hefur það ekkert upp á sig. Maður getur ekki boðið erlendum maka sem þekkir bullið ekki upp á það.

Eini möguleikinn á að spjara sig heima er að eiga húsnæðið svo til skuldlaust, en hver hefur efni á því?

[Sigbjörn. (IP-tala skráð) 11.11.2008 kl. 18:49]

Maður getur alltaf tjaldað jöklatjaldinu í Laugardalnum 

Manni langar að koma heim en eins og þú sagðir, það eru ekki margir sem hafa efni á að koma heim. Konan mín erlend eins og þín og ég er hræddur um að hún myndi setja stólinn fyrir dyrnar er ég færi að útskýra fyrir henni hvernig þetta allt virkar.

Maður verður bara leiður er maður hugsar um unga fólkið sem var að reyna að koma þaki yfir höfuðið og svo foreldra þeirra, ættingja og vini sem voru að ábyrgjast einhvern hluta af lánunum.

Bestu kveðjur.