Blaður

Við fórum á borgarafund í morgun. Borgarstjórar Haarlemmermeer, þar sem Schiphol er staðsettur og Haarlemmerliede, þar sem við búum, vildu fræða fólk um flugslysið og ræða málin. Við entumst ekki lengi, því þeir blöðruðu um ekkert. Þeir fundu til með okkur sem hér búum, skildu áhyggjur okkar af flugumferðinni yfir hausunum á okkur. Þeir væru ekki bara sýslumenn, heldur eins konar feður fólksins sem yrðu að skilja okkur og hjálpa á erfiðum tímum. Bla bla bla.

Ég hafði búist við stuttum og hnitmiðuðum ræðum um það hvað gerðist og hvað á að gera. Mun þetta breyta einhverju. Í staðinn stóðu þeir þarna og blöðruðu eins og háfleygir prestar á sunnudagsmorgni. Hefði ég áhuga á innihaldslausu tilfinningavæli, færi ég í kirkju. Þetta var klúður, finnst mér, og við entumst ekki lengi.

Annars eru hollenskir fjölmiðlar að spekulera fram og til baka um orsakir slyssins. Upphaflega var sagt að flugmaðurinn hafi verið í þjálfun og hefði misst hraða með þessum afleiðingum. Turkish irlines hafa borið þetta til baka, segja hann hafa lokið þjálfun á Boeing 737-800 árið 2004. Líklegra er talið að vélin hafi lent í sogi eftir 757 vél sem lenti innan við tveimur mínútum fyrr.

Sjáum hvernig þetta endar. Kemur í ljós. 

Fyrstu slysamyndirnar birtust á Twitter

Athugasemdir

[Skorrdal (IP-tala skráð) 28.2.2009 kl. 17:38]

Þetta er undarlegt flugslys, verð ég að segja. Hef lent nokkrum sinnum á Schiphol, í stórum og smáum vélum. Eins og ég las í einni frétt hérna heima, þá á vélin að hafa dottið beint niður (þar sem brotlendingarslóðin var ekki löng); það stangast á við allt sem ég veit um flug og flugvélar. Ég veit að ég veit ekki neitt um flut og flugvélar - en mér finnst þessi útskýring vera frekar út í hött; vélin hefði þurft að vera á hraða sem hæfir vart taxi-hraða, til að geta brotlent "beint" niður.

En ég er engin sérfræðingur - hef aldrei flogið flugvél. Veit samt að þær þurfa smá hraða til að fara í loftið og halda sér þar. En þótt svo vél missi afl á báðum (öllum) hreiflum á sama tíma, hefur hún engu að síður nægt "skrið" til að svífa áfram þónokkurn tíma. Þetta er hið undarlegasta slys, verð ég að segja, miðað við mína fátæku þekkingu á flugmálum.

[TARA, 28.2.2009 kl. 18:56]

Slysin gera ekki alltaf boð á undan sér...

[Rakel Sigurgeirsdóttir, 1.3.2009 kl. 00:01]

Blaður er sennilega einkennandi fyrir þá sem vita ekkert hvað þeir eiga að segja. Kannski voru þeir í áfalli sjálfir? en þá áttu þeir að sýna ykkur þá virðingu að fá einhverja aðra til að tala fyrir sig.

[Villi Asgeirsson, 1.3.2009 kl. 07:31]

Það er auðvitað erfitt að segja eitthvað sem allir vilja heyra við hvaða aðstæður sem er. Ég hef það á tilfinngunni að þetta hafi haft meira með egótripp að gera, en áfall. Þeir voru að gera eitthvað voðalega mikið drama úr þessu. En kannski er mitt hjarta kannski bara svona kalt.

[Ragnhildur Kolka, 1.3.2009 kl. 09:12]

Voru mennirnir ekki bara að gera það sem krafan er uppi í dag, þ.e. að "tal við fólkið". Skiptir ekki máli hvað er sagt, bara "tala við fólkið". Það þykir flott PR.

Flugslysanefnd á örugglega efir að skoða þetta og þá kemur eflaust í ljós hvað gerðist.

[Sigurður M Grétarsson, 1.3.2009 kl. 18:39]

Flugvél þarf ákveðin lágmarkshraða til að haldast á lofti. Þetta er mismunandi mikill hraði milli flugvélategunda. Ef vélin fer niður fyrir þennan lágmarkshraða þá missa vængirnir lyftigetu og þar með dettur vélin niður. Þetta er kallað að "stolla" á fagmáli. Í slíkum tilfellum geta flugmenn náð flughraða aftur með því að stinga vélinni og láta þannig aðdráttaraflið koma henni aftur á nægan hraða en við það tapa þeir talsverðri hæð. Ef vélin er í minni hæð en þarf til að ná aftur flughraða þá er voðinn vís og vélin skellur á jörðinni.

Það er sérstaklega mikil hætta á þessu ef vélin missir skyndilega afl. Einnig er mikil hætta á því ef vélin er að svífa inn til lendingar eftir að hafa misst alf og þá sérstaklega ef vegalengdin inn á lendingarstað er nálægt lengsta mögulegu svifvegalengd. Í þeim tilfellum þarf flugmaður að halda hraðanum mjög nálægt "stollhraða" og því má lítið útaf bera til að vélin fari niður fyrir þann hraða. Það er því engan vegin útilokað að flugvélin hafi skollið niður á jörðina eins og verið er að tala um í þessari grein.

[Villi Asgeirsson, 5.3.2009 kl. 08:28]

Ég hef ekkert séð um slysið á MBL eftir blaðamannafundinn í gær, svo ég hendi inn ástæðunni hér.

Á blaðamannafundi í gær, miðvikudag, var sagt að annar hæðarmæla vélarinnar hafi bilað. Flugmennirnir tóku víst ekki eftir því að hann sýndi ranga hæð, né eftir viðvörunarljósinu. Skyggnið var frekar lélegt. Vélin var því á sjálfstýringu, þar sem það er talið öruggara þegar ekki sést til jaðar. Þegar vélin átti eftir rúman einn kílómetra í flugbrautina var hún í 500m hæð. Hæðarmælirinn gaf þó upp -7m (minnir mig), en það er hæð Schiphol. Já, við erum undir sjávarmáli hér í Niðurlandinu. Vélin hélt því að hún væri lent og tók aflið af hreyflunum. Við það missti hún svifið og steyptist til jarðar. Flugmennirnir tóku strax við stjórninni, gáfu hreyflunum fullt afl, en þar sem hún var nú komin í 150m hæð, rakst stélið í jörðina og því fór sem fór. Þetta gerðist allt á örfáum sekúndum.

Flugslysanefndin hefur sent Boeing bréf þar sem farið er fram á að ef hæðarmælar bili, slökkvi vélin á sjálfstýringunni svo flugmenn verði að fljúga sjálfir.