Þjóðstjórn

Enginn veit hversu mikil verðmæti eru eftir í fyrirtækjum útrásarmanna. Það sem við vitum er að ætlast er til að við, þessar 300.000 hræður, borgum helmingi fleiri sparifjáreigendum erlendis. Við berum ábyrgð, hvernig sem á því stendur. Skuldlausa Ísland heyrir sögunni til. Við virðumst vera komin aftur til þess tíma þegar allt var í ólestri. Þjóðarsáttin var til einskis. Ísland virkar ekki. Eða hvað?

 

Hvernig getum við komið okkur út úr þessu klúðri, án þess að skuldsetja þjóðina áratugi fram í tímann? Hvernig getum við endurheimt tandurhreint mannorðið sem er nú jafn fjarlægt og sjáfstæði Tíbet? Hvernig getum við komið í veg fyrir að svona gerist aftur? Hvernig getum við haldið okkar sjálfstæði, efnahagslegu og pólitísku?

 

Alger uppstokkun er sennilega það eina sem virkar. Ísland er hrunið, brunnið til grunna og það hefur lítið upp á sig að reyna að gera við. Við verðum að byrja upp á nýtt, hugsa dæmið frá grunni. Ég tel að það besta sem við getum gert í stöðunni er að sættast við nágrannaþjóðirnar, hversu sárt sem það er. Við verðum að vinna aftur velvild heimsins, almennings að minnsta kosti. Þegar komið er á hreint hvað við skuldum, yrði sett þjóðstjórn fólks úr öllum flokkum og utan flokka. Besti maður í starfið yrði ráðinn, hvort sem hann væri stjórnmálamaður eða ekki. Forsætisráðherra yrði sterkur maður (eða kona) með afgerandi stjórnunarhæfileika. Fjármálaráðherra yrði einstaklingur með vit á fjármálum. Mér dettur Ragnar Önundarson í hug þar sem hann sá þetta fyrir og reyndi að vara okkur við, en það getur verið að betra fólk finnist. Svona yrði stjórnin sett fólki sem hefði vit og áhuga á að koma okkur út úr kviksyndinu sem við erum búin að festa okkur í. Stjórn Seðlabankans yrði stokkuð upp á sama hátt.

 

Allt það fólk sem tæki sæti í stjórn landsins og bankans má ekkert hafa með vandann að gera sem kominn er upp. Það yrði að vera yfir allan vafa hafið, því hlutleysi gagnvart fyrirtækjum og ákvörðunum síðustu ára yrði að vera tryggt.

 

Þegar stjórnkerfi landsins væri komið í gagnið og versta óveðrið gengið yfir, yrði að skoða hvað gerðist. Hverjir eru sekir um spillingu, sofandahátt eða annað sem orsakaði hrunið. Það fólk yrði sótt til saka og látið bera ábyrgð á sínum ákvörðunum. Allar eignir sem tengdust bönkunum yrðu teknar upp í skuldir. Það er óvenjulegt að fyrirtæki beri ábyrgð á einhverju utan eigin kennitölu, en tímar formsatriða eru liðnir. Kennitöluflakk á ekki lengur við. Glitnir var ekki bara Glitnir og dótturfélög. Glitnir var í eigu Baugs og annara félaga. Baugur á því að ganga upp í greiðslur. Þjóðin á ekki að þurfa að borga úr eigin vasa, vegna formsatriða með kennitölur. Jón Ásgeir á ekki Baug eftir það sem hefur gerst. Við eigum Baug og öll dótturfyrirtæki. Dugi þau fyrir skuldum og hafi Jón Ásgeir ekki gert neitt saknæmt, getur hann fengið restina til baka. Á meðan það er að koma í ljós, tæki ríkið við fyrirtækjunum. Seljist Debenhams ekki fyrir þokkalegt verð nú vegna ástands á alþjóðamörkuðum, heldur ríkið því þangað til almennilegt verð fæst, hvort sem það er eftir þrjá mánuði eða þrjú ár. Það sama á við um alla hina sem komu okkur á hausinn. Stjórnmálamenn og flokkar yrðu líka að gera hreint fyrir sínum dyrum og yrðu rannsakaðir. Margir hafa sennilega verið orðaðir við spillinu en voru það ekki. Þeirra nafn yrði hreinsað, meðan aðrir yrðu látnir svara til saka. Nú er tækifæri til að gera Ísland að því spillingarlausa landi sem útlendingar héldu að það væri. Þetta er kannski eitthvað svipað og IMF myndi gera, en er ekki betra ef við gerum þetta sjálf?

 

Þegar þessi mál eru komin á hreint getum við sætt okkur við þær skuldir sem eftir eru, hugsanlega leitað réttar okkar gagnvart öðrum þjóðum sem brugðust og litið fram á veginn í besta landi í heimi.

Ísland enn í kastljósinu

Athugasemdir

[Heidi Strand, 12.10.2008 kl. 23:17]

 Þakka þér fyrir góðan pistill. Mér list vel á þínar tillögur.

[Þórhallur, 13.10.2008 kl. 09:58]

Því miður verður þetta seint að verjuleika, of margir eiga of mikla hagsmuni til að svona sé hægt. Eina færa leiðin væri uppreisn fólksins sem í framhaldi réðu hæft fólk til starfa og það er ekki á döfinni. Held að fólk verði jafn dofið eftir þetta, og sjálfsagt breytist ekkert. stjórnmálmenn halda áfram að ljúga, auðmennirnir líka og fólk gapir eins og það sé andlega fatlað. En auðvitað á að sækja alla þá til saka sem í þessu sukki stóðu, líka stjórnmálamennina sem leyfðu þessu að gerast. Auðvitað á að frysta allar eigur þessara manna og kvenna, líka bankareikninga erlendis. Þetta væri búið að gera ef sjálfstæðisflokkurinn ætlaði sér að gera eitthvað í þessu, en það ætlar hann ekki að gera. munum að hann er hluti af þessu. Þessvegna kemur ekki til greina að hann taki þátt í endurreisninni. Reyndar hefur það lengi verið stefna hans að almenningur borgi og fáir einstaklíngar eignist. Sjáum hvernig þeir hafa selt eigur okka fyrir lítið.