Orrustan um Ísland

Það sem á eftir fer er samsæriskenning sem datt ofan í hausinn á mér. Hún er byggð á atburðum síðustu vikna, en ég get ekki sannað hana og veit ekkert hvort hún stenst nána skoðun. Það væri þó gaman að heyra hvað fólki finnst.

Fundur Á og A verður vonandi árangursríkur. Það er öllum fyrir bestu að þjóðir geti unnið saman að vandanum sem að steðjar. Auðvitað eigum við að skoða okkar rétt, hvort við getum ekki krafist skaðabóta fyrir það sem ríkisstjórn Bretlands gerði. En er sú aðgerð kannski hluti af stærra plani til að knésetja Ísland?

Heyrst hefur að reynt hafi verið að fá lán frá öðrum þjóðum í sumar þegar sá í hvað stefndi. Seðlabankar USA og UK eiga að hafa komið í veg fyrir að við fengjum þau lán og þannig lagt grunninn að hruni íslenska fjármálakerfisins. Þeir sem eitthvað vita um samsæriskenningar, sem reyndar eru blákaldar staðreyndir í mörgum tilfellum, vita að seðlabanki USA er í höndum sömu manna og IMF og Alþjóðbankinn. Þessar stofnanir eru í höndum fárra auðmanna. Þeir eiga að vera að atefna að alheimsstjórn, svokallaðri New World Order þar sem þeir hafa vald yfir mannkyninu öllu. Til að vinna að því marki, hafa heimsálfur verið sameinaðar í ríkjasamtök, svo sem ESB, African Union, Asian Union, NAFTA og fleiri. Evran var tekin upp sem gjaldmiðill Evrópu og nú er verið að leggja grunnin að Amero, gjaldmiðli USA, Kanada og Mexíkó. Hugmyndin er svo að steypa ríkjasamtökunum saman í framtíðinni.

Einhverjar evrópuþjóðir vilja ekki leika með þeim. Ísland er ein þeirra. Með því að knésetja Ísland, er hægt að þvinga IMF upp á okkur og við missum mikið af sjálfsákvörðunarrétti okkar. Það er ekki erfitt að þvinga okkur inn í ESB ef IMF ákveður að það sé okkur fyrir bestu. Þeir loka því á kreditið og bíða. Þegar einn bankinn neitar að fara á hausinn er honum hrint með handafli. Þegar rússar koma svo inn í myndina, virðist dæmið vera að klikka og IMF býðst til að taka þátt í "björguninni". Allt til að missa ekki tökin á atburðarásinni. Það má ekki gerast að við komumst út úr þessu og höldum sjálfstæðinu.

Til að ná markmiðum sínum þurfa þeir alheimskreppu. Þeir pumpuðu því fjármagni inn á markaðinn, en skrúfuðu svo fyrir. Þannig komust fjármálastofnanir í þrot, tortryggnin tók við og hlutabréfin hrynja. Lönd munu sökkva, eitt af öðru, og "bjargvættirnir" munu taka við stjórn.

Erum við á tímamótum í mannkynssögunni? Er þessi New World Order á leiðinni að verða raunveruleiki? 

Stefnt á fund með Darling

Athugasemdir

[Kolbrún Hilmars, 11.10.2008 kl. 18:08]

Merkilegt Villi, fyrir utan það að samsæriskenningar eru alltaf spennandi, þá er áreiðanlega nokkuð til í þessu - voru ekki nýjustu mótmælin á meginlandinu einmitt gegn þessari stefnu?

Það eru enn nokkur stórveldi sem ekki falla inn í NWO; Rússar, Kínverjar og Japanir - svo litla Ísland á enn valkosti

[Æsir (IP-tala skráð) 11.10.2008 kl. 18:08]

Það er eihvernveginn svona sem ég er að upplifa þetta líka

Kveðja

[Villi Asgeirsson, 11.10.2008 kl. 19:36]

Eitt sem mig langar að setja hérna inn. Ég skrifaði þetta í athugasemd á öðru bloggi, en ákvað að geyma þetta hér:

Við megum ekki láta tjalla og aðra tralla buga okkur. Við höfum gengið dýpri for en þetta. Ég er ekki að segja að þetta verði auðvelt, en við getum þetta ef við viljum.

Það var þáttur í sjónvarpinu hér í Hollandi þar sem ástandið var tekið fyrir. Fólk úti á götu var spurt um ástandið. Einn íslendingurinn hafði svörin á hreinu. "Þetta verður erfitt. Við verðum bara að sætta okkur við að lífskjörin fari niður á við, kannski niður a sama plan og Noregur og Svíþjóð. Ef við sökkvum dýpra, getum við alltaf hafið hvalveiðar aftur."

Þetta svar hefur fengið umfjöllun hérna úti. Allavega hef ég verið minntur á það.

[Kreppumaður, 11.10.2008 kl. 20:21]

Skoðun mín á Bretum er ekkert að batna við þetta...

[A.L.F, 11.10.2008 kl. 21:45]

Mér líkar hugsunargangur þinn, þú ert á svipuðum nótum og ég og fleiri sem tengjast mér, öll erum við komin á þá niðurstöðu að hér sem um að ræða fyrirfram ákveðið plot til að ná yfirráðum yfir íslandi sem aldrei hefur viljað taka þátt í leikjum stóru risanna.

Held það eigi eftir að koma í ljós að þetta sé að hluta til rétt, óttast mjög að 3 heimstryrjöldin sé á næstu grösum, en hún verður í öðru formi en við þekkjum á stríðum hér áður fyrr. 

[The Bigot (IP-tala skráð) 11.10.2008 kl. 22:42]

Já, það er alltaf gaman að samsæriskenningum og ber þá að líta á tvennt til viðbótar.

Davíð Oddsson, ásamt t.d. Berlusconi ofl. að tengjast Vanderbil-klúbbi (minninr mig að heitir) sem einmitt er partur af þessu NWO plotti.

Hitt er svo, að havð gerðist í kjölfar 11 september (sem er heil samsæriskenning út af fyrir sig), en þá lækkuði USA stýrivexti á dollara niður í 1% og dældu fjármagni (sem mest er fengið að láni í Kína og olíuríkjum) inn á lánamarkaði. Allt í einu kostuðu peingar slikk, allir fengu lánað sbr. sub-prime og ekki síður "útrásarlánin" okkar og veislan hófst. Þegar allir eru svo búnir að djamma og drekka út á krít kemur bareigandinn og vill að allir geri upp samstundis og enginn má fara heim, út í banka eða slá hvern annan um lán (og enginn vill lána) fyrr en gert hefur verið upp. Stofufangelsi þangað til eða menn geri það sem þeim er sagt þegar stóri pabbi kemur með peningapokann að leysa menn út...

[Tómas Eric, 11.10.2008 kl. 22:48]

Þú hittir nagglan algjörlega á hausinn. Frekar kýs ég Rússana en IMF !

[Tómas Eric, 11.10.2008 kl. 22:49]

Þið hafið örugglega gaman af þessari mynd sem ég gerði fyrir nokkru.

http://tomaseric.blog.is/blog/tomaseric/image/638718/

[Nói Blomsterberg (IP-tala skráð) 11.10.2008 kl. 22:50]

Sæll....

Fyrir rúmlega ári síðan fóru að berast tíðindi um að alheimsfjármálakreppa væri í vændum. Spurningin var ekki hvort heldur hvenær hún skylli á.

Grunur komst á kreik að fórna ætti einum stórum banka og litlu ríki svo stóru löndin gætu fylgst með og lært af. 

Lehmans fór á hliðina. Af hverju var honum ekki komið til bjargar eins og mörgum öðrum bönkum sem minni eru og máttlausari?

Samkvæmt yfirlýsingu frá seðlabanka Íslands sem hægt er að sjá á þessari slóð:

http://www.sedlabanki.is/?PageID=13&NewsID=1888

er hægt að lesa svart á hvítu að seðlabankinn hafi fengið jákvæð viðbrögð frá seðlabönkum annarra landa við ósk þeirra um gjaldyrisskiptasamninga. 

Einhverra hluta vegna virðist það hafa brugðist þegar á reyndi og telja okkar menn augljóst að það hafi verið gert eftir samráð þeirra á milli.... Auk þess gerði seðlabanki Bandaríkjanna EINHLIÐA samning við seðlabanka Noregs, Svíðþjóðar og Danmerkur auk seðlabanka Ástralíu. Því tóku þau lönd að sjálfsögðu fegins hendi.

Seðlabanki Íslands hafði samband við seðlabanka USA í þeirri von um að fá álíka samning og hin norðurlöndin en allt kom fyrir ekki. Þessi áður jákvæðu viðbrögð voru orðin að einu stóru NEI-i. Eins var það með seðlabanka UK og evrópska seðlabankann. Enginn vildi lengur skipta við okkur. 

Hvers vegna?

Af því að við erum lítið ríki með sjálfstæðan gjaldmiðil, sem þýðir að Ísland er litla landið sem á að fórna  svo stóru ríkin geti "horft og lært".

Næsta mál á dagskrá..... Bretland notar fyrsta tækifæri sem gefst til að nýða skóinn af íslendingum.

Glitnir rúllar, allt fer í handaskolum á Íslandi. Gjaldmiðillinn fellur, verðbólgan eykst og lánalínur bankanna sem stóðu eftir lokuðust. Þjóðargjaldþrot var í uppsiglingu.

Með þrotlausum höfuðbleytingum og heilabrotum  náði ríkisstjórnin með hjálp góðra manna að sníða saman eitt stykki lagafrumvarp sem síðan var staðfest á Alþingi. Ég er ekki í vafa um að íslensk stjórnvöld hafi verið í sambandi við stóru löndin, þ.e. Bretland og Bandaríkin með það í huga að fá þeirra hjálp til að halda íslensku þjóðinni á floti.

Nú voru góð ráð dýr fyrir stóru löndin. Þeim hafði í samtölum við Geir Hilmar að morgni mánudags og fram eftir degi verið komið nákvæmlega inn í ástandið sem skapast hafði á Íslandi. Þeim var ljóst að íslenska þjóðin yrði að taka yfir Landsbankann og Glitni.  Þeim var ljóst að með því að taka yfir þessa tvo banka væri boginn spenntur í botn. KB-banki stóð vel og því var þessi áætlun íslendinga vel möguleg. 

Þess vegna var málið einfalt fyrir Stóru löndin. KB-banka yrði að koma á hausinn. Til þess notaði BROWN "the clown" bíræfnar aðferðir sem öllum ætti að vera kunnugar. Ekki nóg með hryðjuverkalögin frægu heldur endurtók hann í sífellu í viðtölum að íslenska þjóðin væri orðin gjaldþrota. Mjög furðulegar yfirlýsingar sökum þess að íslenska þjóðin er ekki í vanskilum með nokkurn skapaðan hlut. Með þessum yfirlýsingum tókst Brown að eyða öllu því trausti sem íslendingar höfðu unnið sér inn á heimsvísu. M.ö.o. hann beindi brunaslöngu og halaði vatni ofan í bátinn sem íslendingar hömuðust við að ausa vatni úr.

Hvers vegna skyldu þessi ríki gera svona lagað ???

Því er auðvelt að svara. Á Íslandi búa 300 þúsund manns. Í Bandaríkjunum búa 300 milljónir manns. Í Evrópu búa....... ég veit ekki hversu margir... en milljónirnar eru margar.  Með því að steypa Íslandi á hausinn verður til agnarsmátt módel af nákvæmlega því sama og myndi gerast í Bandaríkjunum og Evrópu ef sama ástand myndi skapast þar.

Þess vegna fylgjast Bandaríkjamenn, Bretar og aðrar G7 þjóðir náið með hverri hreyfingu ráðamanna á Íslandi og bíða spenntir eftir hver útkoman verður. Það sem þessi lönd þó gleymdu að gera ráð fyrir voru Rússar. Einhverra hluta vegna hefur innkoma Rússa í umræðuna gert það að verkum að "gömul jákvæð" viðbrögð stóru landanna við peningastreymi til Íslands lifnað við...... því miður fyrir þau, of seint.

Akkúrat á þessari stundu bíða ráðamenn stóru þjóðanna með öndina í hálsinum eftir því hver útkoman verður hér hjá okkur. Ekki vegna þess að þeim er svo umhugað um Íslendinga, heldur af því að þá vita þeir hvernig þeir eiga að takast á við vandamálið í sínum löndum og vegna þess að þeir eru spenntir að vita hvort þeir unnu stóra veðmálapottinn um hvort íslendingar myndu meika það ............ eða ekki.

Þetta er mín samsæriskenning og ég er SANNFÆRÐUR um að þegar við erum komin í gegnum þennan öldudal sem við erum í núna, leggja stjórnvöld og seðlabankinn spilin á borðið og upplýsa þjóðina um hvernig "vinir" okkar hafa komið fram við okkur.

[Bimbó (IP-tala skráð) 11.10.2008 kl. 23:00]

Stenst ekki ,, nema þú meinir að Davíð hafi verið handbendi þeirra,, Hið rétta er að árásin á tvíburaturnana var klaufaverk , en leiddi hinsvegar til þeirrar hugmyndar að heyja þriðju heimstyrjöldina á peningamörkuðum vestrænna ríkja,, Arabarnir pumpa inn ódýru fjármagni sem er á gjalddaga um svipað leiti,, fyrst í Bandaríkjunum síðan færist greiðslubyrðin í austurátt sem flóðbylgja,, ríki í greiðsluerfiðleikum geta ekki hjálpað nágrönnum sínum,,enda arabarnir búnir að hækka olíuna uppúr öllu valdi og enginn er aflögufær,,því næst munu þeir ryðjast inní hagkerfin og kaupa fyrirtæki á brunaútsöluverði,, Rússarnir voru hinsvegar ósamþykkir því að ráðist yrði á Ísland,, Því var einn helsti útsendari arabanna og leiguliði látinn æsa til þjóðernisofstækis í heimalandi sínu,, auk þess sem hann beitti fyrir sig sérsveitum í krafti  hryðjuverkalaga ,, til að stúta helstu fyrirtækjum á Íslandi og láta í umferð boli með áprentuðum hatursáróðri,, þá varð japönum nóg boðið , og sögðu að ef hinn vestræni heimur myndi ekki skammast sín og bæta íslendingum skaðann myndu þeir gera það og bjóða betur enn rússar,,Snérist þá bandaríkjunum hugur og hafa fengið Árna matt til viðræðna um hve mikið hann vilji af peningum , hafa einnig boðið neikvæða vexti og ótakmarkaðan lánstíma,, sem mun gera okkur fært að flytja inn lélegt breskt vinnuafl og orginal fótboltabullur sem borða úr nefinu á sér í stað pólverjanna sem flúðu land,,Því verður ljóst að innan fárra ára höfum við styrk til að kaupa upp alla jarðarskika í arabaheiminum á brunaútsölu,,enda verður hann orðinn olíulaus,,

[halkatla, 12.10.2008 kl. 00:10]

Það eina sem ég hef um þetta að segja er að núna borgar sig að hlusta eftir samsærum og viðurkenna þá staðreynd að þegar grunsemdir um þau koma upp, þá liggur eitthvað mjög skelfilegt undir...

[Þorsteinn Sch Thorsteinsson (IP-tala skráð) 12.10.2008 kl. 01:05]

Villi Þú ert ekki sá eini sem ert að hugsa svona, eða um New World Order.

Sjá David Icke : http://www.davidicke.com/forum/showthread.php?p=550157

[Villi Asgeirsson, 12.10.2008 kl. 05:20]

Kolbrún.

Er það ekki merkilegt að það eru einmitt rússar og japanir sem vilja hjálpa? Það skyldi þó aldrei vera.

ALF.

Já, mér sýnist vopn vera orðin úreld. Nútímastríð eru háð í bönkunum og við erum að upplifa "the blits". Það má auðvitað sprengja fólk í öðrum heimshlutum, en við gerum ekki svoleiðis á vesturlöndum, enda engin þörf á.

The Bigot.

Davíð og Björn Bjarna hafa báðir setið fundi Bilderburger hópsins.

Arnór, hefurðu einhverjar heimildir fyrir því að fórna hafi átt litla landinu? Sé þetta satt og hafi það lekið einhvers staðar erum við í allt annari stöðu.

Bimbó. Davíð hefur setið fundi með þessu folki. Maður veit aldrei, en ég vil ekki trúa því upp á nokkurn íslending að hafa tekið þátt í svona aðgerð. Ég held að hann hafi frekar fengið slæm ráð frá "vinum" sínum og leikið af sér.

Anna Karen, ég vona að við höfum rangt fyrir okkur og að þetta sé allt ein stór röð tilviljana.

Þorsteinn, var það ekki David Icke sem talaði um kóngafólk sem eðlur frá annari plánetu? Það er kannski soldið langt gengið, ekki satt? Ég held þetta séu bara ósköp venjulegir, gráðugir mannapar sem hér eiga í hlut.

[Magnús Orri Einarsson (IP-tala skráð) 12.10.2008 kl. 09:20]

Áhugaverðar pælingar og alls ekki eins ósennilegar og ætla mætti. Dabbi "kóngur" sé bara handbendi þeirra NWO manna enda eru allar hans ákvarðanir frá 2005 slæmar þegar litið er til baka. Alþingi (meirihlutinn þar á hverjum tíma) er þá líka partur af þessu plotti enda lagði hann línurnar (reglurnar).

Held reyndar að þetta sé nú ekki alveg svona einfalt en eitthvað er ástandið "kremað" þegar betur er að gáð.

Endilega að verkja upp umræðu í fjölmiðlum um þetta, þá er það kannski pikkað upp af þeim stóru út í heimi (nema ef þeim er stjórnað af NWO mönnum).

[Thor Svensson (IP-tala skráð) 12.10.2008 kl. 09:48]

Ha ha ha ha ha... guð minn góður þvílík veruleikafyrring! En skiljanleg í ljósi atburða.

[Gullvagninn (IP-tala skráð) 12.10.2008 kl. 10:07]

Þetta er ágæt kenning hjá þér, ef ég má, smá leiðréttingar:

1. IMF og Alþjóðabankinn vinna ávalt með "elítu" fórnar-landanna.  Það vantar insiderana hjá þér.  Þú þekkir þá á risastórum mútusamningum, oft flytja þeir svo út til að búa í friði, fjarri fólkinu sem það svíkur
   
2. sbr lið 1, þá þarf líklega ekki að "þvinga" ráðamenn okkar, allavega ekki þá sem hafa bústna svissnesska reikninga, heldur er þetta allt leikrit fyrir þjóðina,
   
3. sbr lið 2, þá er eini séns okkar á að sleppa út, ef bústnu sviss svikararnir eru fjarlægðir, eða ef heiðarlegri, en valdaminni þingmenn / embættismenn ná að sjá hvað er að gerast og yfirbuga þá bústnu.

[Helgi Jóhann Hauksson, 12.10.2008 kl. 10:49]

Þá þyrftu lykilmenn í íslenska kerfinu að hafa spilað lykilhlutverk í samsærinu, og satt að segja get ég ekki alveg séð það hafa gerst. Þ.e. þeir sem ákváðu að leita ekki til Noregs og Svíþjóðar eins og ráðherrar þeirra landa hafa upplýst og sá sem ákvað að nýta ekki lánaheimild Alþingis til Seðlabanka í sumar uppá 500 milljarða þegar vaxtaálagið var um eða innan við 100 punktar. Einnig þyrfti sá sem réð svimandi háum stýrivöxtum í litla opna örkerfinu okkar og ákvað vexti eins og við værum lokað sjálfsþurftarkerfi án frjálsra viðskipta við umheiminn að hafa spilað lykilhlutverk í samsærinu. Í raun þyrfti Davíð Oddsson að hafa verið einn höfuðpaura samsærisins ef þetta hefði átt að ganga upp. - Og þrátt fyrir allt væri það ekki síðasti maðurinn til að taka þátt í samsæri um að koma okkur í ESB og jafnvel verra að svipta okkur sjálfræði undir IMF?

[Guðmundur Ásgeirsson, 12.10.2008 kl. 11:31]

Hér er sjónarhorn sem fæstir virðast sjá í þessari umræðu:

Þeir sem hafa undanfarin 8 ár unnið við að móta utanríkisstefnu Bandaríkjanna eru flestir gamlir kaldastriðs-haukar með hagsmunatengsl við stórar iðnaðar- og vopnaframleiðslu samsteypur, ein sú stærsta er British Aerospace eða BAE Systems sem er NB í eigu Breta! Aðilar í þessum geira fengu talsverðan skell þegar Sovétríkin urðu skyndilega gjaldþrota og mikill niðurskurður var gerður á vígbúnaði í kjölfarið. Á meðan Clinton sat í embætti notuðu þeir svo tímann til þess að skipuleggja valdaránið sem var framið í  bandarísku forseta"kosningunum" árið 2000, og undirbúa áætlanir til að hrinda í framkvæmd "endurkomu" kalda stríðsins. Til að geta hrint þeim í framkvæmd vantaði hinsvegar nógu gott tilefni, en það birtist þeim svo á silfurfati þann 11. september 2001 og síðan þá hefur allt stefnt á einn veg. Sá atburður leiddi m.a. til setningar þeirra hryðjuverkalaga sem nú er búið að beita gegn íslenskum fyrirtækjum, með íslensku starfsfólki!

Því miður hef ég illan grun um að efnahagslega séum við komin í sömu stöðu og Georgía er komin í hernaðarlegum skilningi, við erum aðeins peð í heimspólitísku endatafli! Guð blessi Ísland.

[Þorvaldur Þórsson (IP-tala skráð) 12.10.2008 kl. 12:19]

Í gær var ég með merkilega skýrslu milli handana. Það var skýrsla sem lokið var við að vinna í apríl 2008 og afhennt fjármálaráðuneytinu og Fjármálaeftirliti í júlí á þessu ári. Þar er nákvæmlega farið yfir íslenska fjármálakerfi og atburðarás eins og sú sem hefur spunnist síðustu 2 viku nánast rakin upp. Það var sterklega varað við öllu því sem núna er búið að gerast. Þetta voru mjög alvarlegar athugasemdir. Þessi skýrsla var unnin mjög fagmannlega og hefði átt að vara menn við hér. Skýrslan var unnin af London School of Economic. Hvað gerðu menn hér????? Þessari skýrslu var stungið undir stór í Seðlabankanum og Fjármálaráðuneytinu. Það var sem sagt ákveðið að þegja um þetta!!!! Af hverju gerðu menn ekkert í þessu þegar búið var að vara þá mjög alvarlega við þessu???

[Jón Aðalsteinn Jónsson, 12.10.2008 kl. 14:04]

Það sem EB vantar er fiskimið og ódýr orka það er það sem við höfum Norðmenn eru i deilum við okkur um fisk og umráðarétt yfir hafsbotni það er samsæri í gangi og eins og Ragnar sagði þá megum við ekki skrifa undir einhverja Versalasamninga

[Ómar Bjarki Kristjánsson, 12.10.2008 kl. 16:24]

Jón Sigurðsson hefur líka farið á Bildebergfund (Bildeberg er að vísu í mörgum lögum eða þrepum.  Telja má víst að við eru ekki að tala um æðstu þrep viðvíkjandi Ísl.)

En um kenninguna í inngangspistli... ég veit ekki.  Samt umhugsunarvert.

En það sem flækir þá stöðuna, sér maður strax, er að hvaða hlutverki gengdi Seðlabankastjóri Íslands ?  Undir hans stjórn sem Forsætisráðherra er skapaður grundvöllur fyrir að fjármálastarfsemi geti átt sér stað eins og hefur verið undanfarin ár á Islandi.  Engar hömlur og tískustraumar í hagfræði hafðir að leiðarljósi o.s.frv.

Nú, alla tíð má segja að hann sé persónugervingur á Íslandi fyrir andstöðu við Evru og ESB.

Sem sagt, eina leiðin til að láta þetta ganga upp er að menn (þó þeir hafi sótt Bildebergfundi) hafi hreinlega ekki gert sér grein fyrir að þeir voru strengjabrúður afla og baktjaldasamtaka etc.  Bara peð. 

Einnig er umhugsunarvert að bankastofnanir erlendis hljóta að hafa gert sér grein fyrir að hve riskí bisnes íslandsdæmið var.  Samt td. gáfu viðurkennd erlend matsfyrirtæki íslensku bönkunum alltaf topp lánshæfismat o.s.frv (þar til á lokasprettinum)

[Nói Blomsterberg (IP-tala skráð) 12.10.2008 kl. 18:34]

Villi....

 Áreiðanlegar heimildir.

[halkatla, 12.10.2008 kl. 19:26]

Guð blessi þig Villi! Ég óska þess líka...

En ég mæli með David Icke í alvöru, sleppum öllu ruglinu, hann er samt að tala um ALLT HITT af miklum vitsmunum og við verðum að opna augun. 

[bimbó (IP-tala skráð) 12.10.2008 kl. 23:02]

ÆÆI,, ekki biðja okkur um slíkt Anna Karen,, sjálfur er ég búinn að horfa á þessa hryllingsmynd aftur og aftur,,sem barn horfði ég á Roy Roger´s aftur og aftur,, Leggjum bara aftur augun og yljum okkur við minningar sem okkur líkar, þurkum hinar út,,Það er alveg sama hve mikið við rugglum hér á síðunni ,, ekki versnar ástandið við það,, verra getur það varla orðið á tækniöld,,

[Heimir Arnar Birgisson (IP-tala skráð) 14.10.2008 kl. 18:14]

Þið ættuð að horfa á þessa mynd. Hún svara öllum ykkar spurningum. 

Hana er einnig hægt að kaupa á síðunni:

http://www.themoneymasters.com/ 

Held að allir þeir sem ætla á annað borð að tjá sig um kreppuna hérna á íslandi verði að skilja hvað liggur á bakvið fjármálakerfi heimsins til þess að geta mögulega talað af nokkru viti. Þessi mynd ætti að vera skyldulærdómur í framhaldsskólum, því ef við þekkjum ekki söguna, þá getum við ekki skilið nútíðina, hvað þá spáð í framtíðina.

Guðjón I. Guðjónsson vill meina að í 999 skipti af hverjum 1000 sé ekki um neitt samsæri að ræða. Það væri gaman að sjá hvort að þessi mynd breyti einhverju um þá skoðun hans. 

[Guðmundur Ásgeirsson, 14.10.2008 kl. 23:10]

Ómar, góður punktur með matsfyrirtækin.

Í erlendum fjárfestingarbönkum þar sem sýslað er með billjarða per mínútu, hafa menn nefninlega oft engan tíma til að lesa hverja einustu svona skýrslu, hvað þá um litla 300.000 manna "fyrirtækjasamsteypu" í N-Atlantshafi. Því taka menn gjarnan (meðvitað eða ómeðvitað) þá áhættu í slíkum tilvikum að treysta talsvert á þessi svokölluðu matsfyrirtæki. (Þið vitið þessi með skrýtnu nöfnin, og nei þau starfa ekki í matvælaiðnaði ;) Í Bandaríkjunum eru aðeins tíu svona matsfyrirtæki með starfsleyfi og af þeim eru þrjú sem ráða yfir 90-95% hlutdeild í heimsmarkaðnum á þessu sviði, en það eru Standard & Poor's, Moody's, og Fitch. Það er því óhætt að segja að þessi þrjú fyrirtæki geti haft mikil áhrif á það hvert lausafjármagn flæðir í heiminum ef þau kærðu sig um það, tilgangur þeirra er hinsvegar að veita óháða ráðgjöf og því þykir æskilegast að þau séu hafin yfir allan vafa umað hafa óhreint í pokahorninu. Starfsemi þeirra er að öllum líkindum ekki mjög frábrugðin því sem greiningardeildir bankastofnana fást við, en munurinn er sá að banki er ekki óháður aðili sé hann virkur á markaði. Banki eða deild innan hans má því ekki gefa út neinar skýrslur eða greiningarniðurstöður undir því yfirskini að um óhlutdrægar upplýsingar sé að ræða, vilji hann vernda orðspor sitt.

Það voru svo þessi sömu matsfyrirtæki sem gáfu Íslandi OG íslensku bönkunum þefalt A fram í rauðan dauðann, þrátt fyrir allar þær viðvaranir og skýrslur sem hér hafa verið taldar upp. Þetta hlýtur okkur "samsærishyggjumönnum" að þykja athyglisvert í ljósi þess að það sömu matsfyrirtækin gáfu bandarísku "undirmálslánunum" svokölluðu LÍKA þrefalt A, jafnvel þó svo að lítið væri á bak við þá pappíra annað en tvíveðsetning á bandaríska húsnæðismarkaðnum. Þau gerðu þannig fullt af fólki fólki kleift að endurveðsetja húseignir sínar gegn auðfengnu lánsfé, sem streymdu svo í kjölfarið inn á hlutabréfamarkaðina sem keyrðust upp í kapphlaupi allra um skjótfenginn hagnað. ("Nú er sko komið að mér að fjárfesta í hlutabréfum, haha!"). Þannig varð til sú bóla sem nú er sprungin, með vítahring sem hefði aldrei stoppað af sjálfu sér fyrr en eitthvað varð til þess að gripið var inn í eða bólan hefði "sprungið".

Annað sem matsfyrirtæki hafa m.a. verið gagnrýnd fyrir er að þau geti hreinlega búið til og ýtt undir slíka vítahringi. Sérstaklega í umhverfi þar sem eru litlar takmarkanir á fjármagnsflæði (eins og t.d. á Íslandi en aðeins Hong Kong leyfir meira hömluleysi skv. WEF) geta öflugir fjárfestar hæglega búið til óhagstæðar kringumstæður fyrir smærri aðila og keyrt þá inn í atburðarás sem kallast því óhugnanlega nafni "dauðaspírall", en þá er "tekin staða gegn" viðkomandi aðila eins og það hefur verið kallað og hámarkshagnaður næst ef á endanum tekst að keyra fórnarlambið algerlega í gjaldþrot. Ef matsfyrirtækin sjá ekki slíka atburðarás fyrir heldur verða aðeins vör við hana eftir á bregðast þau gjarnan við með því að lækka lánshæfismat viðkomandi, ekki síst vegna eigin orðspors sem myndi óhjákvæmilega rýrna ef fyritæki með einkunn AAA myndi skyndilega sigla í strand. Slík lækkun lánhæfismats getur aftur á móti haft þveröfug áhirf og rýrt traust annara fjárfesta enn frekar, en við það lokast fleiri "lánalínur" sem áður voru opnar, og svo koll af kolli þar til lánshæfið er raunverulega orðið ekkert.

Á mannamáli jafngildir þetta því að yfirdráttarheimildin hafi verið afturkölluð og reikningshafa gert að greiða hana upp með skömmum fyrirvara. Hringurinn þrengist og lánhæfismatið lækkar en frekar, lánadrottnar kippa hver af öðrum að sér höndum þar til allt lánsfjárframboð til viðkomandi aðila er uppþornað. Í ákvæðum sumra skuldabréfa sem fyrirtæki eins og bankar gefa út er jafnvel að finna atriði sem virkja sjálfkrafa veðköll um leið og lánshæfismatið fer niður fyrir ákveðið viðmið. Það þýðir að um leið og slíkt ferli er farið í gang stendur valið milli þess að annars vegar greiða af eigin fé bankans og rýra með því undirstöður hans, eða hinsvegar að lenda í vanskilum og standa hugsanlega frammi fyrir lagaflækjum og eignaupptöku með ófyrirsjánlegum afleiðingum fyrir aðra viðskiptavini og orðspor bankans. Þeim mun háðara sem fyrirtækið er lausafjárstreyminu, því fyrr veslast það upp og deyr undir þessum kringumstæðum.

Hér að ofan hefur í grunnatriðum verið lýst svipaðri atburðarás og í Glitnismálinu hérna heima, sem varð svo kveikjan að þeim hörmungum sem nú hafa dunið yfir okkur. Það getur verið erfitt að segja til hvort um einhverskonar "áhlaup" hafi verið að ræða, eða einfaldlega keðjuverkun sem fór af stað á óheppilegum tímapunkti með slíkum ógnarhraða að ekki varð við neitt ráðið. Ef við hugsum okkur hinsvegar atburðarás þar sem óeðlileg tengsl eru á milli "viðurkenndra" matsfyrirtækja og stórra fjárfestingarbanka eða -sjóða, þá er hægðarleikur að spinna í kringum það brjálæðislegustu samsæriskenningar kæri maður sig um það á annað borð. Þeirri skýringu hefur verið haldið nokkuð á lofti hér heima að gjaldþrot Lehman Brothers hafi átt stóran þátt í því að koma Glitni í klípu, sem Seðlabankastjóri vill reyndar meina að hafi verið vonlaus staða en um það eru hinsvegar skiptar skoðanir.

Athyglisverður punktur sem drukknaði næstum í fréttum af bönkunum sjálfum í síðustu viku, var að á sama tíma og lá fyrir að sett yrðu neyðarlög vegna yfirvofandi bankakreppu bárust fréttir af því að í Reykjavík væru útsendarar frá JP Morgan fjárfestingarbankanum og hefðu m.a. setið fund með yfirvöldum í Ráðherrabústaðnum þá örlagaríku helgi. Þeir sem lesið hafa hina frábæru bók Falið Vald ættu að kannast vel við nafnið, en J. P. Morgan er einmitt álitinn hafa verið "hönnuðurinn" að bankakreppunni 1914 og vofa hans hefur svifið yfir vötnum í öllum bankakreppum síðan. Og viti menn á fréttamannafundi daginn eftir þann fund (mánudegi) lýsir Geir H. Haarde því yfir að nú standi yfir versta bankakreppa frá árinu 1914, já hann sagði 1914 og getur því ekki hafa verið að tala um Heimskreppuna Miklu 1929! Þess skal getið að þetta var fyrsta tilvísunin í þessa bankakreppu sem ég man eftir að hafa heyrt í hringiðu undanfarinna tveggja vikna, menn hafa fyrst og fremst vísað til Heimskreppunnar en eftir að Geir hafði orð á þessu hafa reyndar aðrir étið tilvísunina upp eftir honum. Þarna spilar mögulega inn í vanþekking okkar á sögunni en flestir núlifandi Íslendingar voru hvorki fæddir 1914 eða 1929 og þeir fáu sem það voru er ekki víst að muni vel svo langt aftur í tímann. (Þið vitið, Alzheimer og það allt saman... með fullri virðingu samt.)

Lengra er ég ekki kominn í þessum vangaveltum að sinni, en ljóst er að þetta þarf að rannsaka af óháðum aðilum. Og miðað við hversu tamt Fjármálaeftirlitinu virðist vera að þegja yfir óþægilegum hlutum þá er útilokað að það sé hæft til þess að rannsaka málið, sérstaklega þar sem það á sjálft aðild að málinu. Til gamans vil ég geta þess að ég hef tvisvar sinnum sótt um vinnu hjá FME en í bæði skiptin verið hafnað um starf þar. Ef Jónas hefur strax þá vitað í hvað stefndi eins og skýrsla Willem Buiter og félaga segir til um, og hann ákveðið að þegja yfir því hversu mikilli hættu við værum í, þá er ég ekki hissa þó hann hafi stoppað umsóknina mína, sérstaklega ef hann hefur verið að lesa bloggið mitt! ;)

P.S. Heyrði þennan einlínubrandara (e. one-liner) í dag: "Hver er hann eiginlega þessi Triple-A sem allir eru að tala um? Er hann kannski rappari eins og hinn þarna... Nas Daq var það ekki?"

Þess má einnig til gamans geta að í Bandaríkjunum eru samtök bíleigenda (svipuð og FÍB) sem heita Automobile Association of America, en skammstöfunin á nafni þeirra er nær undantekningalaust borin fram: "Triple-A".